DVG ta amplia su canalnan di comunicacion

Pa mantene pueblo bon informa

ORANJESTAD (AAN): Directie Volksgezondheid Aruba, DVG, ta reforza su compromiso pa mantene comunicacion cla, lihe y accesibel pa tur ciudadano. Meta principal ta sigura cu informacion importante riba salud publico ta yega na cada cas, cada bario y cada persona, sin importa si e persona ta usa social media of no.

   Den un tempo unda informacion ta move lihe y situacionnan di salud por cambia den poco ora, comunicacion corecto y oportuno ta esensial. DVG ta consciente cu no tur hende ta activo riba social media, y p’esey a amplia y diversifica su canalnan pa alcanza mayoria di poblacion.

   Actualmente, ciudadano por sigui DVG riba (*) Facebook bou di e nomber Directie Volksgezondheid. (*) Instagram bou di e mesun nomber. (*) WhatsApp Channel oficial di Directie Volksgezondheid. (*) Aruba Health App, unda tur comunicado publico ta wordo publica. (*) Website oficial: dvg.aw

    Cu e ampliacion aki, DVG ta crea mas cercania cu comunidad y ta fortalece su rol manera fuente confiabel di informacion riba enfermedadnan infeccioso, vacunacion, salud preventivo, emergencia sanitario y otro asunto cu tin impacto directo riba bienestar di nos pueblo.

   Salud publico ta responsabilidad di tur nos. Informacion corecto ta proteha bida, ta preveni desinformacion y ta yuda comunidad tuma decisionnan mas consciente.

   Awo no tin ningun excusa pa keda desinforma,sigui nos riba nos canalnan oficial y keda al dia cu e ultimo desaroyo den salud publico.   Pasobra Bo salud ta nos prioridad.