No tin impuestonan cu a subi ni tazanan di Grondbelasting cu a wordo ahusta

Director di DIMP Luenne Gomez Pieters:

• Entrante 2027 ta drenta un periodo nobo di termino 5 aña pa Grondbelasting 

ORANJESTAD (AAN): Drs. Luenne Gomez-Pieters, Director di Departamento di Impuesto di Aruba (DIMP), a declara den entrevista cu Matutino DIARIO, cu te unda nan tin informacion no tin impuestonan cu a subi, y a specifica cu no tin tazanan di Grondbelasting cu a wordo ahusta.

   Gomez-Pieters a señala cu e sistemanan di grondbelasting t’asina si, cu un termino di cinco aña unda cu e balor ta wordo stipula pa un periodo di cinco aña. “Te cu 2026 esaki ta delaster aña di e periodo di cinco aña. Entrante 2027, ta drenta un periodo nobo di termino pa e cobranza di grondbelasting”, directora di DIMP a relata.

   El a splica tambe cu si por ehemplo, dentro di e periodo di cinco aña (aña dos, of tres, por ehemplo) e doño di e cas a traha un pool, y otro cosnan adicional na dje, tur esey ta hisa e balor di e propiedad, meymey di e periodo di cinco aña.

   El a reitera cu un pool ta un inversion, naturalmente meymey di e propiedad inmovil, cu por causa cu e balor di e tereno, incluso cu loke ta traha riba dje, ta aumenta e balor di e periodo cu ta bin, y por ta e cobranza ta mas  halto cu e aña anterior.

   Director di DIMP a sigui splica cu tin un “aangifteplicht”, unda cu e contribuyente mester avisa e inspector pa por bin haci un opname, y si esaki no ta pasa, ora cu e inspector haya sa, si e contribuyente no declara, automaticamente nan ta pasa y nan  constata, e ora ey e persona por haya un cobranza cu ta mas halto cu e añanan anterior.

   “Manera mi a menciona anteriormente, nos kier pa nos contribuyentenan ta den control di nan aspectonan fiscal. Awo, nos ni un no ta gusta paga impuesto, pero esey ta e reglanan di e wega; pa nos por draai un pais, nos por atende cu e retonan di e pais, y e entrada di impuesto ta un di e drivers cu ta duna gobierno e espacio pa por inverti den infrastructura di careteranan, etc. Ta suppose cu nos ta haya beneficionan, no directo, pero unda nos tur ta beneficia di pensioen, seguro medico, infrastructura, seguridad general, etc., etc. Anto, tin un ‘aangifteplicht’ den grondbelasting, pa duna un resumen y si e contribuyente no atende cu esaki, logicamente e inspector ta keda haci su trabao y si nan bin wak cu tin un pool, un garashi, of un patio cu no a wordo declara, e cobranza lo bay conoce un ahuste”, Diorector di DIMP, Luenne Gomez-Pieters, a relata.