Barco crusero a drenta vap-vap pa trece pasahero malo na Aruba

Riba Diamars atardi

ORANJESTAD (AAN): Riba Diamars atardi un yamada di urgencia a drenta na Capitania di Aruba, for di e barco crusero Serenade of the Seas, cu e momento ey ta varios miya pabao di Aruba.  E barco aki ta actualmente riba un itinerario di ‘Southern Caribbean’, cu a sali Diasabra 21 di Februari for di Colon (Panama) y ta regresa eynan riba Diasabra 28 di Februari.  Esaki ta un di e viahenan cu ta uzando un homeport pafo di Merca, como cu hopi hende di exterior no kier viaha mas pa Merca pa subi crusero na Florida, mirando cu Inmigracion di ICE ta capturando hopi turista inocentemente.

   E barco a bishita Diadomingo e ciudad di Cartagena (Colombia), y riba schedule ta poni cu Dialuna y Diamars ta bay ta riba lama, y Diaranson lo ta bishitando Bonaire.  Riba su schedule e lo ta awe Diahuebs na waf di Oranjestad na Aruba.

   Emergencia abordo: Tin indicacion cu tabatin pashent cu a bira malo, y e situacion di e persona ta hopi mas grave cu loke e Docter abordo por atende, pues tin mester di tratamento mas specializa.

   E momento ey nan ta riba lama ta moviendo pa Bonaire.  A consulta cu Capitan, y e Docter a splica cu nan no por warda te Diaranson pa yega Bonaire, como cu e caso ta urgente.  A mira cu e port mas cercano ta Aruba, y asina a dicidi cu ta bay djis stop un rato na Aruba pa baha e pashent.

   Banda di 6:00 pm e barco a cuminza acerca Oranjestad, y pa exactamente 6:20 pm, e barco a mara na berth B di Waf di Playa.  E momento ey tabatin dos otro cruiseship den Waf di Aruba ainda, esta Norwegian Sky cu ta mara na berth C, y tambe Oasis of the Seas cu tabata mara na berth I.   Pa casualidad, eynan na berth B como un ora prome, esta 5:00 pm e crusero Oceania Insignia a caba di bandona Aruba.

   E cabuyanan a los y pa 7:05 pm e barco a hala bek for di Waf, y a sigui riba su rumbo pa isla di Bonaire.  El a mara Diaranson mainta pa 7:55 am na e Pier na isla di Bonaire.

   Na Aruba mientras tanto e pashent a keda abao na tera y interna na Dr. Horacio Oduber Hospital.  E agencia di Royal Caribbean International a keda encarga pa tur e logistica di e pashent.

   Awe e barco lo tey na Waf di Aruba atrobe.  Serenade of the Seas tin capacidad maximo di carga 2.578 pasahero.