Unit Narcotica a detene 3 sospechoso y a confisca 167 kilo marihuana y 1 arma di candela

Entrada hudicial

ORANJESTAD (AAN): Cuerpo Policial a informa cu en conexion cu un caso na unda aña pasa un total di 167 kilo di marihuana  a wordo intercepta via carga pa Aruba tres persona a wordo deteni. Unit Narcotica no a para keto y a sigui investiga,  compila informacion importante pa combati criminalidad cu a conduci na detencion di 3 persona. Ta trata di e hombernan di inicial J.G.A.A nacionalidad Venezolano di 30 aña y C.A.R.A nacionalidad Venezolano di 35 aña tambe e hende muher di inicial Y.V.C.R  naci na Aruba di 43 aña di edad.

A haci un entrada hudicial na un percela na Cayenastraat y na Bakval. Durante e entrada hudicial Unit Narcotica a canta bingo y a haya un arma di candela y esaki a wordo confisca pa mas investigacion.

Pa cu entrada hudicial a haci uzo di Teamnan special pa ehecuta un tremendo accion bon coordina ta trata di Team di aresto, Unidad di k-9 di polis, BFTO y polis uniforma.

No ta descarta cu lo tin mas detencion.

Cuerpo Policial ta haci un apelacion cu si bo sa algo of bo a mira algo yama e tiplijn di polis cu ta 11141. Bo ta keda anonimo.