Gobierno a anuncia modernisacion di beach policy

Despues di mas cu 10 aña

ORANJESTAD (AAN): Minister di Turismo, Transporte y Labor y Minister di Infrastructura a anuncia oficialmente inicio di un revision integral y modernisacion di e beach policy di Aruba, marcando un paso decisivo y tan spera padilanti den e maneho responsabel di e isla su activo natural mas valioso: su beachnan publico.

   E beach policy actual, conoci formalmente como RRIS (Richtlijn Ruimtelijke Inrichting Stranden), ta na vigor pa mas cu diez aña. E guianan aki ta regula e uzo, zonificacion y desaroyo di beachnan publico. Sinembargo, mirando e crecemento rapido di turismo, e demandanan espacial cu ta evoluciona y realidadnan ambiental y social nobo, e beach policy ta rekeri un actualisacion urgente.

   Paso revolucionario: Pa prome biaha den mas di un decada, Gobierno di Aruba ta tuma accion concreto pa revisa y modernisa e RRIS. E iniciativa aki ta representa un reforma structural den con ta goberna, maneha y proteha nos beachnan.

   E proceso di modernisacion lo:  (*) Revisa y actualisa e guianan espacial di RRIS. (*) Atende cu e retonan actual relaciona cu uzo y saturacion di beach. (*) Introduci regulacionnan mas estricto y cla. (*)

Agrega un beach nobo bou di e beach policy. (*) Percura pa un miho reparticion y balansa den henter e beachnan di Aruba.

   E proceso lo conta cu sosten di Directie Infrastructuur en Planning (DIP) respalda pa Ministerio di Turismo y Ministerio di Infrastructura, locual ta demostra un cooperacion interministerial solido.

   Tur beach ta publico: Minister Wendrick Cicilia a enfatisa un principio fundamental cu a guia e anuncio di e mainta: “Ningun beach na Aruba nunca lo ta propiedad di un hotel”. Tur beach ta keda publico y accesibel pa e Rubiano como pa e bishitante. E beach policy modernisa lo reenforsa e derecho aki, garantisando e acceso husto y proteccion di e espacio publico.

   Sosten di sector turistico: Aruba Tourism Authority, pa medio di Minister di Turismo, a contribui cu financiamento parcial pa sostene e proceso di modernisacion.

   Esaki ta enfatisa e responsabilidad comparti entre gobierno y stakeholdernan di turismo pa maneha e beachnan di Aruba di un manera sostenibel y responsabel.

   Dialogo cu stakeholder: Den e siguiente simannan, Gobierno lo inicia un dialogo structura cu tur stakeholder relevante, incluyendo hoteleronan, operadonan di tour, gruponan di medio ambiente, representantenan di comunidad y demas partnernan.

   E meta ta pa sigura cu beach policy modernisa ta refleha un participacion amplio mientras ta salvaguardia e interes publico.

   Gobernacion responsabel: E anuncio aki ta resalta cu e Gobierno actual ta tumando accion decisivo unda, pa añanan largo, no a haci ningun reforma structural. Despues di mas cu dies aña sin revision, e modernisacion di RRIS ta demostra liderazgo responsabel y un compromiso cla pa goberna crecemento di turismo den un destinacion consolida.

   Door di modernisa y revisa e beach policy, Aruba ta tuma un paso significativo den direccion di un planificacion espacial sostenibel, reparticion husto di beach y proteccion a largo plaso di un di su activonan nacional mas balora.

   “Beach ta pa tur hende, awe y pa e generacionnan binidero”, asina Minister Wendrick Cicilia a finalisa bisando.