Den razzia na dos adres a detene tres hende incluyendo un muhe

Autoridad ta sigui keda confisca droga

ORANJESTAD (AAN): Siman a habri cu e informacion suministra door di Polis, cu nan Unit Narcotica a traha riba un caso, y a tene un razzia na dos adres.  Danki na esaki nan a detene tres persona naci na Aruba, y a confisca droga tipo ‘hasj’ tambe.

   Polis a indica cu recientemente a wordo intercepta diferente barco cu carga di droga (‘hasj’) aden. En total 4 kilo di hasj a wordo confisca door di autoridadnan.

   Relaciona cu e cargo di droga aki, Unit Narcotica a haci nan investigacion, y cu bendicion di Fiscal nan a actua rapido y tene dos razzia na casnan.

   Cu yudansa di Team di Aresto, e oficialnan hudicial a tene dos razzia.  Den e entrada hudicial, nan a actua na un cas na Bubali y tambe na un cas na Sero Patrishi.

   A detene un hende homber naci na Aruba di inicial F.A.G. di 35 aña , un hende homber naci na Aruba di inicial M.J..D.G. di 26 aña y un hende muhe na Aruba di inicial S.M.J. di 23 aña.

   Durante e entrada hudicial a haci uso di diferente departamento di Cuerpo Policial Aruba entre otro Team di Aresto, Unit K-9 y polis uniforma.

   Polis a bisa cu no ta descarta cu lo por tin mas detencion den e caso encuestion. Cuerpo Policial ta keda haci un suplica nba esnan cu sa algo of a wak algo pa yama tipline di Polis na 111-41.  Corda cu nan ta garantiza cu bo ta keda anonimo.