Despues di IPKO a sigui awo cu Tripartite entre Aruba, Curacao y Sint Maarten

Presidente di Parlamento Marlon Sneek:

ORANJESTAD (AAN) President di Parlamento, señor Marlon Sneek, a splica den entrevista cu DIARIO, cu e idea pa tene reunionnan di IPKO den e parti Caribense di Reino, y mescos den e parti Hulandes di Reino, cu ta e aspecto europeo, ta pa haya un bista, y specialmente pa e parlamentarionan nobo haya un bista di kico ta ser papia.

   “Pasobra hopi biaha e Hulandesnan cu nunca a bin aki banda, ‘ta pensa riba un par di Indian ta core tras di otro’, pero pa nan mira cu tin desaroyo total akinan, y cu e responsabilidad di cualkier gobierno ta pa garantiza e miho, pa cada ciudadano cu nan ta representa”,  Marlon Sneek a acentua.

   Seguidamente na IPKO a sigui cu tripartite, Sneek a splica. “Tripartite ta e temanan cu ta ‘touch’ e miembronan directo di Reino, cu ta e parti Caribense di Reino: Aruba, Curacao y St. Maarten. Temanan cu nos tin sigur ta temanan cu mester tin concordancia den dje, kico ta e temanan cu ta atrasa ainda, con nos por pack nan up, cual ta e temanan cu nos ta kere cu como parti Caribense, nos kier atende cu nan, p’asina nos tin algo uniform; tambe e mesun tema di conectividad ta bay bin un biaha mas dilanti, pasobra ta keda un preocupacion con nos por garantiza cu nos miembronan di Reino den e parti Caribense aki, por sigui bishita otro”, Presidente di Parlamento a indica.

   El a subraya cu hopi aña atras, 1996, 30 aña pasa, un pasashi tabata costa 100 Florin, y awo nos tur sa su prijs! “Esey ta temanan cu nos ta bay discuti pa wak si di parti di gobierno, den e caso aki, kico lo por wordo haci pa tin un miho prijs pa nos ciudadanonan”, Presidente di Parlamento Marlon Sneek a reitera.

Finalmente el a indica cu cada parlamentario lo hiba e asunto aki cerca nan respectivo gobierno, pa nan yuda resolve e problema aki.