Minister di Infrastructura a haya presentacion innovativo di organisacion PLACE

ORANJESTAD (AAN): Durante un presentacion na SETAR, Minister di Infrastructura, drs. Rene Herdé a ricibi informacion riba un proyecto innovativo encabesa p’e organisacion internacional PLACE,

un entidad sin fin lucrativo cu ta dedica na adkiri imagen di resolucion halto di tereno.

Segun Minister Herdé, e proyecto ta ofrece potretnan y mapa di Aruba cu un nivel di precision sumamente halto, cu ta permiti uzo strategico pa planificacion fisico, infrastructura, naturaleza, seguridad y desaroyo urbano.

“E nivel di detaye ta asina halto cu e informacion por wordo uza pa planificacion di caya, edificio, tuberia y diferente proyecto di Infrastructura,” Minister Herdé a splica.

E proyecto ta implica pa saca potret aereo detaya di nos isla, locual lo facilita acceso na informacion geografico valioso pa departamento gubernamental, companianan di utilidad y sector priva.

Segun Minister Herdé, e balor di e tipo di informacion aki ta enorme, paso e ta permiti decisionnan cu mas precision, inversion mas efectivo y un planificacion mas sostenibel pa futuro di Aruba.

E organisacion PLACE lo traha estrechamente cu diferente departamento local durante un periodo di aproximadamente un luna, cu meta pa posiciona Aruba como un ehempel den uzo di tecnologia geografico pa desaroyo moderno.

Minister Herdé a indica cu esaki ta un paso importante pa modernisa planificacion infrastructural di Aruba y crea un base solido pa mas desaroyo den futuro.

Minister Herdé kier gradici PLACE, DIP y DLV pa organisa e Proyecto, DOW pa nan presencia y SETAR pa financia y facilita esaki.