Tematica di vivienda ta un asunto urgente cu mester atencion inmediato

Miembro di Parlamento John Hart:

ORANJESTAD (AAN): Miembro di Parlamento John Hart a expresa su gran preocupacion riba e situacion actual di vivienda na Aruba, indicando cu pa hopi di nos yiu di tera, cumpra of huur un cas ta bira impagabel y den algun caso hasta imposibel.

“Na momento cu nos ta stimula nos 'young professionals' na Hulanda pa bolbe Aruba, un di e prome preguntanan ta: mi por haya trabou? Y despues ta bin un pregunta igual di importante: mi por haya un cas pa biba?” asina Hart a declara.

Segun e parlamentario, e tematica di vivienda ta un asunto urgente cu mester atencion inmediato. E ta dirigi preguntanan formal na Minister di Infraestructura, Sr. Rene Herde, pa claridad riba e maneho y direccion di politica di vivienda. Ademas, el a pidi Presidente di Parlamento, Sr. Marlon Sneek, pa un vragenuur pa habri e debate den Parlamento cu a keda programa pa dia 2 di maart proximo.

Un parti esencial di e iniciativa aki ta cu Miembro di Parlamento Hart a scoge deliberadamente pa hiba e voz di comunidat mes den Parlamento. Pa medio di e pagina di Facebook AVP Fraccion y un publicacion specifico riba e tema di vivienda, ciudadanonan ta invita pa comparti nan preocupacionnan, pregunta, comentario y ideanan.

“Mi kier pa Parlamento tende e voz real di pueblo. No solamente stadistica, pero experiencia di hende cu ta sufri e problema tur dia. E reaccionnan y sugerencianan cu nos a ricibi ta forma parti di e argumento cu lo presenta y defende den debate,” Hart a enfatisa.

El a agrega cu pueblo di Aruba merece claridad riba e direccion cu e gobierno ta hiba den e asunto aki, y cu Parlamento tin un deber pa traha na solucionnan concreto y sostenibel. “Vivienda no por sigui ta un luho; e ta un derecho basico. Nos yiu di tera merece oportunidad real pa biba y progresa na nan propio pais.”

Miembro di Parlamento John Hart ta haci un yamada pa un acercamento integral y urgente pa enfrenta e reto di vivienda, cu solucionnan accesibel y realista pa nos comunidad.