Tin indicacion cu ta bala di un solo Polis a tira mata Ayden Lanoy

Caso grandi den Corte

• Investigacion ta mustra esey 

ORANJESTAD (AAN): E tratamento di e lamentable caso caminda dos agente di Polis a tira riba un auto cu a causa morto di Ayden C.J. Lanoy di 19 aña di edad, a dura henter Diabierna mainta. Investigacion ta mustra cu tin indicacion cu un di e balanan cu un agente di Polis a tira a mata Ayden Lanoy.

   Video di tiramento pasa den Corte: Hues a laga pasa video di e tiramento di 9 Februari 2025 den sala di Corte. Promer Hues tabatin un reunion apart cu e mayornan di Ayden Lanoy, abogadonan di e agentenan y e agentenan. Despues Hues a sigui cu e caso caminda tur e publico tabata presente. Hues a bolbe pasa e video y a bisa cu riba e video ta mira e auto Toyota y e patruya ta yega na e caya cu ta caba na nada. E auto Toyota a bira y bay para casi pega cu auto di Polis cu a blokia e caminda. Despues e auto ta hala atras.

   Mientrastanto ta mira e dos Polisnan baha cu arma den man.  Agente M.V. tabata chauffeur y Agente R.G.D. sinta na banda. Hues a bisa cu loke ta notable ta cu mesora M.V. y R.G.D. a dirigi arma riba e auto. No tin sonido pero ta mira e tiramento. E momento di e promer tiro, ta un punto di discusion.

   Landsrecherche ta di opinion cu e promer tiro a cay ora e auto tabata bay atras, mientras cu abogadonan di e Polisnan no ta di acuerdo cu esey. Hues a bisa cu por mira claramente cu M.V. y R.G.D. ta tira.  M.V. tabata para dilanti di e auto y R.G.D. tabata na banda. R.G.D. a keda tira den banda y patras di e auto.

   Hues a opina cu e imagennan di e video di seguridad ta mustra cu e auto kier a core bay y no ataca e agentenan di Polis. Hues a bisa cu Agente M.V., despues di a mira e video, a bisa cu e no ta cuadra cu manera el a experenci’e.  Agente R.G.D. si a bisa cu loke ta mira ta loke el a experencia. Hues a mustra cu riba e video por mira cu e auto ta kita na man drechi di e agente M.V. cu ta para dilanti di e auto mientras cu M.V. y R.G.D. tabata tira riba e auto. Despues di un rato e auto a para. Segun M.V, el a bula un banda y ora e tabata na suela el a mira cu e taira robez tabata den su direccion. R.G.D. a bisa cu el a mira cu e auto tabata bay riba M.V. Por a mira cu e auto a core bay poco poco y dal contra algo y stop. Hues a bisa cu Lanoy tabata drumi herida. A purba reanim’e pero el a fayece.

   Bala a perfora un ader principal: Investigacion ta mustra cu un bala a alcanza Ayden Lanoy di robez pa drechi. E bala a performa un ader mayor di Ayden Lanoy y door di perdida di sanger el a fayece.

   Hues a puntra M.V. kico e ta pensa di e caso.  Agente M.V. e ora emocional a bisa cu e no por a pensa cu door di usa arma un persona a fayece. El a bisa cu tur dia e ta purba sobrepasa e pensamentonan. Hues a puntr’e si e kier bisa algo na e mayornan di Lanoy. El a bisa cu nunca e tabata kier a haci algo asina.

   E otro agente R.G.D. a bisa cu e caso ta traha riba dje tur dia. Mas tanto ora di drumi. E ta lamenta loke a sosode. El a bisa cu como Polis bo tey pa yuda y no algo asina. Hues a puntr’e si e kier bisa algo na e mayornan. El a bisa cu e no por bisa nada cu lo por cambia loke a sosode.

   Un agente a tira Ayden mata: Hues a bisa cu e pregunta ta, kende a tira e tiro mortal. Hues a bisa cu e peña di R.G.D. tabata benta abao bashi. Investigacion tecnico ta mustra cu hopi impacto di balanan na banda robez di auto. E bala na banda robez di e porta a alcanza Ayden Lanoy mortal.

   Segun Hues, tur cos ta mustra cu e tiro a sali for di e arma di Agente R.G.D.  Hues a bisa cu M.V. a los 3 tiro y 1 tiro so a impacta e auto dilanti. G.D.R. tabata na banda y a los 17 tiro y ta parce cu un di e tironan a impacta Ayden Lanoy. Segun M.V., el a los un tiro riba hood di motor, un tiro ora e tabata abao. E no sa di tres tiro.

   Ayden Lanoy a wordo describi como un hoben cu ta respeta tur hende, ta un trahador balente laborando na Save More na Boegoeroei, y den pasado a yega di competi cu su talenti musical den Voz-i-Landia Escolar 2019 unda el a presenta cu un cancion di artista Jeon.  Despues di su morto, tabatin varios accion di protesta contra brutalidad policial cu a costa bida di Ayden, y hasta a organiza uno na Rotterdam (Hulanda).

   Den demas articulo por lesa mas di e caso aki den Corte.