Presidente di SADA Edward Maduro:
- Awo tin un miembro di directiva den Corte bringando un rapport contra dje
ORANJESTAD (AAN)-- Presidente di Sindicato di Aduana Aruba (SADA), señor Edward Maduro, den entrevista cu DIARIO, a sigui elabora riba e situacion cu ta reina den seno di Aduana.
El a expresa cu tur caminda den e Departamento di Aduana tin problema, y e gobierno anterior, e ex-minister sa den detaye kico ta tur problema y tur esakinan a keda riba mesa, pa e minister nobo.
“E Minister nobo sa di tur e problemanan aki, pero te aworaki ni un solucion. Esey ta falta di maneho, ora bo no tin vision bo no por maneha na un manera profesional, pero den e punto cu nos no a sali mucho den publicidad, nos tin otro problema cu a bira mas erg aworaki, cu nos tin internamente den nos sindicato, mirando cu e contratempo cu nos ta hayando for di e director a bira, mi ta kere, diez biaha mas hopi cu bao e maneho di ex-minister ”, Maduro a indica.
El a señala cu bao e maneho di e gobierno anterior ta hopi problema SADA a haya pa funciona como un sindicato, pa via cu e director no tin respet pa e sindicato, unda e ta purba persigui e miembronan di su directiva, aworaki el a bay asina leu, cu tin miembro di e directiva cu a wordo raporta y cu nan a bay Corte, door cu e ta haciendo su trabao den e directiva.
“Es mas, el a atende un reunion cu Minister Wever, ken a invita e directiva di e sindicato y nan a asisti na e reunion aki, y el a informa e minister y el a inform’e kico ta ‘going on’ y cu e persecusion a bira di mas. Pero, lamentablemente, esey a pasa, e miembro a wordo raporta, a pidi gobierno pa duna instruccion pa trek e rapport pasobra como trahado y como miembro di e sindicato e ta wordo priva di haci su trabao sindical, cual internacionalmente esey ta wordo proteha, pero na Aduana parce cu si mag persigui miembronan di directiva, y miembronan di e sindicato cu ta expresa nan malcontento, con e director aki ta maneha e departamento. Anto, aworaki nos a pone cu hendenan a cuminza evalua si ta bal la pena sigui den un directiva, unda bo ta haci bo trabao boluntario, anto bo ta pone bo trabao na riesgo”, Edward Maduro, lider di SADA, a señala.
El a subraya cu e minister no a atende e asunto aki debidamente, nan tin e miembro di e directiva cu ta un ambtenaar den Corte aworaki, pa bringa e rapport disciplinario, cu por cost’e su salario, y caus’e kizas mas problema den futuro, cu hasta por perde su trabao, Edward Maduro a remarca.
