Accion pa combati candela grandi den Parke Curason na Jaburibari

ORANJESTAD (AAN): Diahuebs anochi algo prome cu 8'or alarma a wordo bati na 911, pa un candela den Parke Curason na Jaburibari. 

   Algun minuut pasa di 8'or un truck di Brandweer a yega y a bay directamente unda e candela tabata visibel. Esaki tabata e caya panort di e parke.  Pero nan no por a yega cerca, debi cu e entrada eynan tabata cera cu candal y aparentemente e truck lo no tabata tin herment pa cort'e. 

   Mirando cu e candela a cuminsa expande rapidamente tanto Polis y Brandweer a usa un entrada banda di pariba pa a drenta.

   Brandweernan a cuminsa combati e candela di mondi, cu a bira grandi den un tempo record y a pasa bay pafo banda panort. 

    E huma tabata causando hopi molester pa e casnan mas tanto parti pabao.  No ta conoci kico por a start e candela.