Mucha homber di 16 aña declara liber di a abusa di un mucha muher

Hues ta haya cu no tin prueba di sosten

ORANJESTAD (AAN): E hoben homber Colombia biba na Aruba, R. (16), ayera mainta a scucha Hues declar’e liber di e acusacionnan di a abusa di e mucha muher E. y tambe di a haci actonan inmoral cu E.

   Den sala di Corte tabata presente e mayornan di R. Notabel tabata cu ni e victima E., ni e mayornan di E. no a presenta. E acusacion cu Fiscal a presenta den sala di Corte contra R ta cu riba 19 October 2024, el a abusa di e mucha muher E. y haci actonan inmoral cun’e.

ABUSA DI MUCHA

Hues a puntra R. si el a tene relacion sexual cu E. Segun R., e mucha E. tabata di acuerdo pa nan tabatin relacion sexual. Durante tratamento di e caso a sali na cla cu e mucha E. tabata den mesun klas cu R. na school. Nan tabata amigo di otro. Segun R., e tabata bay na cas di E. Tin biaha 3 biaha pa luna. Nan tabata studia hunto. El a bisa cu na school nan tabata hunto. R. a bisa cu 19 October 2024 nan a planea pa bay laman hunto y E. a bisa R. pa busca un bebida alcoholico pa nan bebe.

BEBE FOUR LOKO NA BEACH

E mama di E. a hiba nan laman y nan a planea pa bay cu bebida alcoholico. Segun R., e amiga E. a pidi pa bin cu bebida alcoholico pa e sinti burachi. Sin cu e mama di E. sa, R. a hiba un bleki di Four Loko. Na beach, R. y E. a bebe 80 % di e bleki Four Loko. Nan a haci esaki scondi sin cu e mama di E. sa. Nan a sinti un poco marea y a bay den laman. Na dado momento nan a tene relacion sexual. R. a splica Hues con tur cos a sosode den laman. Segun R, na dado momento E. a coy su parti intimo y hink’e den su parti intimo. Despues E. a rabia y a sali for di laman. R. ta kere cu E. lo a rabia pasobra e amistad entre nan a cambia den un relacion di pareha. R. a bisa Hues cu for di principio nan a palabra cu nan ta keda amigo y no kier ta pareha di otro. Ariba beach e mucha E. a whatsapp su mama pa busk’e y R. a whatsapp su ruman muher pa busk’e. Despues R. a whatsapp E. y bisa cu loke a pasa no mester a pasa y a pidi disculpa.

FAMIA A BATI MUCHA

Ta asina cu su siguiente dia, E. a whatsapp R. pa e bay serca dje pa nan papia. Ora R. a yega na e cas, E. a bay cun’e den camber. E. a sali y bolbe cu su ruman, su mama y su padastro kendenan a bati R. Nan a kita e cellular di R. y e cellular a wordo limpia completo pa no tin ningun mensahe.

   Hues a bisa cu E. a declara na Polis cu ora el a bebe Four Loko, el a sinti hopi marea y sinti malo. El a bay den laman y na dado momento R. a sunchi e y el a pusha R. pa stop. Despues R. a bay su tras, bras’e y mishi na su parti intimo. E. a pusha R. pero R. a sigui. Segun E., el a pusha R. diferente biaha y despues R. a hinca su dede den su parti intimo y E. a push’e y bisa no. E. a sigui declara na Polis cu despues R. a kita su paña y a baha e bikini di E. y a penetr’e. E. a bis’e no pero R. a keda. E. a pusha R. atrobe y a bisti su bikini y sali for di laman hopi rabia.

1. a reacciona y bisa Hues cu tin cosnan cu E. a bisa cu no ta berdad. El a bisa Hues cu e no a penetra E. sino cu E. a coy R. su parti intimo y hinca den su parti intimo.

   Hues a mustra cu E. a declara cu el a conta su ruman muher kico a pasa y e ruman muher a whatsapp e mama pa bay na cas di e padastro pa e mama haya sa kico a sosode.

   Door di e situacion aki, ambos a kita for di school y ta bayendo otro school separa.

FISCAL

Fiscal a bisa Hues cu mama di E. a haci denuncia contra R. E victima E. a whatsapp su ruman muher pa papia cun’e. El a bay na cas di e padastro y a conta su ruman muher cu el a wordo viola. Na opinion di Fiscal, E. dia 19 October 2024 a declara na Polis casi mesun cos. Fiscal ta considera e declaracion di E. confiabel. El a mustra cu di otro banda tin declaracion di R. kende ta bisa cu voluntariamente nan a tene relacion sexual. Fiscal a mustra cu R. a nenga di a forza E. di tin relacion sexual. Fiscal ta haya cu tin suficiente prueba di sosten. Fiscal ta haya R. culpabel. Fiscal ta haya cu R. a abusa di su amiga di school. Fiscal a sigui bisa cu R. a abusa di e confianza cu e amiga E. tabatin den dje. Pa cu e castigo, Fiscal a tene cuenta cu R. tabatin 14 aña ora esaki a sosode. Fiscal a bisa cu e mester aplica castigo hubenil cu ta stipula cu e castigo mas halto ta 12 luna di prison. Fiscal a tene cuenta cu ta promer biaha cu R. ta cay den man di husticia y ta bayendo school. Tambe Fiscal a tene cuenta cu R. a wordo maltrata door di e famia di E. Fiscal a exigi 8 luna di prison condicional cu 2 aña di prueba. Esey ta nifica cu R. no mester bay sera.

ABOGADO TA EXIGI DECLARA HOBEN LIBER

Abogado mr. Hernandez a bisa Hues cu e ta haya e declaracion di E. no confiabel. Na opinion di e abogado, den linea grandi nan ta papia e mesun cos. E abogado a mustra cu E. no a bisa Polis cu el a wordo forza pa bebe Four Loko pero el a bisa e ruman muher asina. E abogado a mustra cu ta E. a pidi R. pa bay cu alcohol pa bebe scondi na beach. E. ta bisa cu el a kita R. su mannan siendo cu R. ta bisa cu ta E. a coy su mannan y pone na su parti intimo. E abogado ta haya cu e actuacion di E. den laman, no ta mustra cu e tabata contra di tene relacion sexual. E abogado ta kere cu por ta door di berguenza cu su mayornan lo a haya sa, E. a bay bisa. E abogado a mustra cu no tin raport medico y tampoco raport psycologico, cu por determina cu E. a wordo abusa. E abogado ta haya straño cu e mayornan di E. a kita R. su celluar y kita tur e mensahenan. E mayornan di E., dia 24 October 2025, a hiba e cellular school pa director duna R. E abogado ta haya cu no tin suficiente prueba di sosten cu R. a abusa di E. El a bisa Hues cu e hecho cu E. tabata yora no kiermen cu el a wordo viola. E por ta tambe cu e tabatin berguenza di loke a sosode. E abogado tampoco ta haya cu R. a haci actonan inmoral cu E. E abogado ta haya cu nan tabata experimenta cu otro y tabata un relacion voluntario. E abogado a insisti pa declara R. liber.

HUES TA DECLARA HOBEN LIBER

Hues a sera tratamento di e caso y a dicta sentencia di biaha. Hues a bisa cu e ta haya cu no tin suficiente prueba di sosten. Na opinion di Hues, e yoramento di E. no ta suficiente prueba cu lo tabatin forzamento. E por ta rabia manera R. mes a bisa. Tambe Hues a mustra cu e mama di E. no a mira nada emocional riba E. ora E. a bay den auto. Hues a declara R. liber di abuso sexual. Pa loke ta e acusacion di inmoralidad, Hues ta haya esaki no a sosode contra voluntad di E. Hues ta haya cu no tin suficiente prueba pa inmoralidad. Hues a declara E. liber di tur dos acusacion.