Diferente hende herida den accident fuerte na Cumana

ORANJESTAD (AAN): Tabata Diaranson anochi algo pasa di 10’or a sosode un accidente basta serio riba caminda di Santa Cruz pa Oranjestad, na altura di Cumana.

   E accidente tabata riba e crusada di cerca di Bon Dia Supermarket.  Debi na tantisimo yamada, ta varios patruya di Polis como tambe diferente Ambulance a wordo manda pa e lugar, incluyendo e Rapid Responder di ImSan.

   Na yegada di polis nan ta topa cu e autonan benta panort di caminda. Tabata trata di Toyota Vitz hatchback color shinishi cla y Kia Rio hatchback color shinishi scur.  Testigonan a splica cu ta e Kia Rio a subi caminda, sin duna preferencia na e Toyota Vitz.  Debi na e impacto, y e momentum di movimento, e Toyota Vitz a baha di caminda y bay dal contra un auto Mazda 2 hatchback color blanco.

   Paramediconan a hiba esnan cu mester tratamento mas avansa Hospital y por a mira cu e chauffeur di e Vitz a wordo controla na e lugar mes, pero e no tabata tin mester di bay Hospital.

   Caminda a wordo cera, pa trafico di Oranjestad pa Santa Cruz y trafico di Hooiberg pa Cumana mester a desvia.  Daño material ta considerabel.