Uitvoeringsrapportage di kwartaal 4 di Presupuesto 2025 entrega na CAft

Minister Geoffrey Wever:

ORANJESTAD (AAN): Departamento di Finansa cada kwartal ta compila e “Uitvoeringsrapportage” basa riba cifranan preliminario di e administracion central di Pais Aruba y cifranan ricibi di entidadnan manera AZV, SVb, ATA, Serlimar, Stichting EPB y Universidad di Aruba cu ta forma parti di e sector colectivo. 

Den e di cuarto Uitvoeringsrapportage 2025 cifranan preliminario di entrada y gasto te cu 31 di december 2025 ta wordo presenta. Cu e elaboracion di e cuentanan anual di 2025 e cifranan lo wordo finalisa y acompaña cu un splicacion detaya. E crecemento di economia den e ultimo seis lunanan di 2025 a conduci na mas entrada di BBO y invoerrechten. Ambos ta fungi como indicadornan pa crecemento economico, mas consumo y mas inversion. E resultado preliminario ta cumpli cu e normanan di presupuesto manera stipula pa ley di supervision financiero (LAFt). 

E resultado di operacion pa aña 2025 a yega na un surplus di Afl. 300,4 miyon. Esaki ta 150% mas halto cu loke tabata presupuesta. E gastonan a aumenta cu Afl. 49,7 miyon compara cu 2024, mientras cu e entrada a crece cu Afl. 55,5 miyon. E presupuesto di entrada a wordo realisa pa 101%, mientras cu e gastonan a wordo ehecuta pa 95%. Esaki ta confirma cu e maneho di finansa publico ta estricto, disciplina y di acuerdo cu normanan ancra den ley. 

Entrada di belasting directo y indirecto a mustra un crecemento di 3,4% compara cu e mesun periodo di 2024, cu un aumento di Afl. 50,5 miyon. E resultado aki ta refleha un economia cu ta sigui desaroya y un nivel di actividad economico duradero. 

Den cuadro di inversionnan, e ehecucion den e tercer kwartaal tabata mas abou cu planifica, pero te cu e cuater kwartaal di 2025 a realisa Afl. 30,0 miyon na inversionnan, cu ta representa 40% di e presupuesto di inversion. Gobierno ta mantene un maneho responsabel, balansando inversion cu sostenibilidad fiscal. 

E surplus financiero total compara cu BNP a yega na 3,6% den e cuater kwartaal di 2025, mientras cu den presupuesto a wordo proyecta 1,7%. Compara cu e tercer kwartaal e norma a baha cu 0,1 porciento. Debe a wordo paga mas cu loke tabata presupuesta, cual a reduci e necesidad di financiamento. 

E saldo total di prestamonan local y internacional di Pais Aruba ta Afl. 5079,2 miyon, cu ta 64,6% di BNP. Esaki ta representa un aumento leve di 0,8 porciento compara cu e tercer kwartaal. Gobierno ta sigui maneha debe di forma cauteloso y responsabel. 

E ratio di debe di e sector colectivo te cu 31 di december 2025 ta 63,6%. E tendencia descendente cu a inicia den 2024 ta sigui den 2025. E saldo di financiamento di e sector colectivo ta mustra un mehoracion, cu un resultado positivo di +6,1% te cu 31 di december 2025. 

E resultado di explotacion di henter e sector colectivo, incluyendo Pais Aruba, ta Afl. 496,6 miyon. Esaki ta confirma cu Aruba ta riba e caminda corecto pa logra e normanan acorda y fortifica su posicion financiero. 

E gastonan total di personal, segun definicion di e personeelslastennorm, ta 8,2% di BNP te cu 31 di december 2025. Cu esaki Pais Aruba ta cumpli cu e norma manera stipula den Landsverordening Aruba tijdelijk financieel toezicht (LAft). Den e añanan benidero lo pone enfasis riba medida structural di maneho, di acuerdo cu articulo 14, segundo lid, pa garantisa cu e “public wage bill” ta keda bou di 10%. Gobierno lo instala un comision cu lo formula propuesta pa sigura cumplimento structural cu e norma aki.

“E resultado di 2025 ta mustra cu disciplina fiscal, planificacion correcto y maneho responsabel ta duna resultado concreto. Nos ta sigui proteha finansa publico, paga debe di forma estructural y crea espacio pa inversion sostenibel,” Minister di Finansa Geoffrey Wever, a declara.

Minister Wever a enfatisa cu e cifranan positivo aki no ta un resultado accidental, sino e fruto di maneho consistente, transparencia y cumpli cu e cuadro legal. “Aruba ta demostra cu liderazgo firme y colaboracion institucional, nos por mantene stabilidad financiero y alabes crea un base pa crecemento economico resiliente.”

Cu e entrega di e cuarto Uitvoeringsrapportage 2025, Gobierno di Aruba ta reafirma su compromiso cu transparencia, bon gobernacion y un finansa publico duradero.

Minister Geoffrey Wever ta gradici Departamento di Finansa pa e trabao di traha e uitvoeringsrapportage y entrega esaki na CAft. Den cuadro di transparencia y informacion. Parlamento di Aruba tambe ta ricibi e uitvoeringsrapportahe kwartaal 4 di 2025.

###CH#