Prome Minister Eman a bishita Museo di Carnaval pa dialogo riba reactivacion y futuro pilar di Carnaval

Idea pa Museo di Carnaval genera placa pa organiza evento

ORANJESTAD (AAN): Recientemente Prome Minister Mike Eman a bishita e Museo di Carnaval na San Nicolas pa un reunion fructifero cu SMAC, cu meta pa explora e reactivacion y e maximo potencial di e museo como un pilar cultural pa Carnaval y Distrito di San Nicolas.

   E bishita a surgi despues di un combersacion reciente, caminda Prome Minister Eman a extende personalmente un invitacion na SMAC pa bishita e museo. Durante e rondleiding, e partinan involucra a dialoga riba posibel plannan pa desaroyo futuro di Carnaval, cu un enfoke riba beneficio pa gruponan di Carnaval, e comunidad di San Nicolas, musiconan, partnernan clave y tur cu ta forma parti di e celebracion cultural aki.

   Desde su inauguracion na aña 2012, e Museo di Carnaval no a explora ni maneha na su maximo potencial. No obstante, e museo ta considera como un activo cultural importante cu por aporta significativamente na turismo cultural, identidad local y preservacion di historia di Carnaval.

Durante e ultimo cuatro temporada di Carnaval, SMAC, bou liderazgo di Darren van Ommeren, a haci varios intento pa sinta na mesa cu Gobierno anterior pa discuti continuacion y maneho apropia di e museo, sin por a logra progreso concreto te awor.

    “Esaki ta un proyecto di SMAC pa continuacion y desaroyo di nos Carnaval. Nos ta spera cu, cu colaboracion di Gobierno, e proyecto aki por concretisa na beneficio di tur cu ta stima y aporta na Carnaval di Aruba,” segun Darren van Ommeren.

   Segun SMAC, e obhetivo ta cu e proximo directiva y presidente por asumi e maneho integral di e proyecto, garantisando continuidad y un uzo sostenibel di e museo. Van Ommeren a indica cu, siendo Carnaval 72 su ultimo temporada como Presidente di SMAC, e ta keda positivo cu e capitulo aki por cera den luna di juni cu un proyecto cla y prepara pa ehecucion pa e proximo directiva.

Finalmente, SMAC a informa cu lo mantene contacto estrecho cu DOW y Gobierno di Aruba pa monitorea e desaroyonan den e lunanan cu ta bin, cu e bishita aki siendo un paso importante den direccion di reactivacion di Museo di Carnaval y fortalecemento di Carnaval como expresion cultural central pa Aruba.