Variante di Covid-19 detecta na Africa clasifica door di WHO como uno “preocupante”

E ta potencialmente hopi contagioso ---  ORANJESTAD (AAN): E variante B.1.1.529 di Covid-19 detecta pa prome biaha na Africa, a wordo clasifica diabierna como "preocupante" pa e Organisacion Mundial di Salud (OMS/WHO) y lo carga e nomber di "omicron".

"E variante aki a wordo notifica pa prome biaha na OMS pa Sudafrica dia 24 di November 2021 (...). E variante aki tin un gran number di mutacionnan, algun di cual ta preocupante", asina a bisa e grupo di expertonan encarga pa OMS di sigui e evolucion di Covid-19.

Belgica a anuncia diabierna cu ta e prome pais europeo cu a detecta un caso di e variante nobo y varios pais ya caba a cancela of restringi vuelonan procedente di e parti zuid di Africa.

E identificacion di e variante nobo aki di Covid-19, potencialmente hopi contagioso y cu multiple mutacion, a wordo anuncia diahuebs na Zuid Africa.

A detecta un caso na Hong Kong, otro na Israel den un persona cu tabata regresa for di Malaui y otro na Belgica.