Ta necesario pa Polis cu Respaldo y otronan concerni firma un  protocol

Minister di Salud y Asunto Social Mervin Watt-Ras:

• Pa trece claridad ki ora si, ki ora no, por actua y con pa actua 

ORANJESTAD (AAN) Minister di Salud y Asuntonan Social, Mervin Wyatt-Ras, den entrevista cu Matutino DIARIO a expresa cu problema di salud mental no ta un situacion di aworaki sino di basta tempo, y cu aworaki por mira e consecuencianan di no a wordo suficientemente atendi, den añanan, y ta mira cu, de vez en cuando, algo ta surgi.

E mandatario a señala cu locual a pasa ultimamente, ta casonan lamentable, manera esun cu polisnan y trahadornan di Respaldo.

   Minster Wyatt-Ras a expresa empatia cu palabranan di forza pa tur esnan envolvi y nan famianan, pero tambe e trahadornan pasobra no ta facil pa atende cu personanan cu problema di salud mental. E ta un reto no solamente pa e parti psikiatrico-psicologico pero tambe e aspecto humano.

   “Ta hopi importante cu na dado momento, un persona cu problema di salud mental, tin biaha (ta depende di locual e ta sufri di dje), e no ta reacciona na e manera cu ta wordo spera di dje.

   Tin biaha, tin momentonan cu e persona ta perde di dje, ora ta surgi situacionnan”, segun Minister Wyatt-Ras.

   El a agrega cu locual si ta importante ta cu nan tin un stuur groep, cu na momento cu el a asumi su responsabilidad como minister, a haci posible cu e stuur groep aki, continua den su funcion.

   “Kiermen, nan tin reunionnan, frecuentemente, cu diferente stakeholder tocante locual cu ta surgi tambe, e casonan cu tin, y den e network y e platform aki, casi tur e actornan cu ta envolvi”, e dignatario a splica.

   E mandatario a referi na e persona cu a fayece ora e tabata na cas, y el a señala cu ta necesario pa tin un bon protocol firma entre e diferente actornan, manera KPA y e otronan concerni pa tin claridad ki ora si, ki ora no, ta actua y kico si kico no. “Kiermen esaki ta un punto cu ta wordo discuti entre e diferente entidadnan aki, y KPA y Respaldo, p’asina yega na concretiza e protocol aki”, e mandatario a indica.

   “Ta berdad cu nos Ministerio a haya nos confronta cu un situacion cu nos mester cu deal cu ne, y nos tin diferente entidad cu ta na encargo di esaki. Tin Respaldo cu ta duna tratamento mas specializa, ayudo, guia, terapia y tambe un di segundo liña, y tin esun cu ta wordo duna den prome liña pa personanan por acudi na momento cu nan sinti cu nan tin un of otro preocupacion y cu algo no ta bay bon. Tin biaha nan ta bay Stichting Hunto of tambe na DAS, y asina ey, e forma di referencia ta algo cu aworaki mi ta bezig cu ne”, e dignatario a señala.