Fraccion di MEP a reuni cu Respaldo den e prome mesa di dialogo pa salud mental

Parlamentario Evelyn Wever-Croes:

ORANJESTAD (AAN): Dialuna mainta, Fraccion di MEP a cuminsa cu ronda di consulta riba e tema di salud mental. E problematica di salud mental tin henter Aruba preocupa. Den e ultimo lunanan, tawatin varios caso extremo, entre otro suicidionan. Parlamentario Wever-Croes a remarca, cu di parti di Parlamento y especial Fraccion di MEP, lo haci lo posibel pa yuda bringa e problematica grandi aki na Aruba.

   Fraccion di MEP ta kere cu pa haya solucionnan real, nos mester scucha e expertonan riba e campo social. P’esey a cuminsa cu e consultanan cu tur instancia social pa haya miho bista unda por duna aporte y uni forsa pa salba bida. E prome reunion di e ronda di consulta tabata cu Respaldo cu a brinda hopi informacion y recomendacion valioso.

   Segun e Parlamentario, intencion ta pa na final di e ronda di consultanan, pone tur informacion y recomendacion hunto y traha un raport y plan di accion concreto cu e recomendacionnan cu Aruba tin mester. Y despues cu esaki ta completa, lo pidi ministernan pa bin pronto den Parlamento pa hunto debati riba tur e recomendacionnan aki.

   “Sea ta cambio di ley of presupuesto, of loke cu Parlamento por yuda, nos mester haci esaki awo. Cada caso di suicidio ta un caso di mas. Tur esnan cu ta buscando ayudo merece di haya ayudo. Y pa e motibo aki, Fraccion di MEP a cuminsa cu e ronda di consulta cu tur instancia social riba e tema di salud mental. MEP ta aki pa trece solucion. Pasobra pa nos, e prioridad semper ta e famianan di Aruba. Hunto, nos lo sigui construi un Aruba cu ta dushi pa biba riba dje”, Parlamentario Wever-Croes a enfatisa.