Studentenflat den Oranjestad ta un proyecto innovativo pa bienestar di studiantenan

Minister Rene Herdé

ORANJESTAD (AAN): Dialuna atardi Minister di Vivienda y Infrastructura, drs. Rene Herdé tawata tin e honor pa presencia e ceremonia di “groundbreaking” na e edificio bieu di Ministerio Publico (OM).

E proyecto ta un colaboracion di Gobierno, Universidad di Aruba (UA) y Fundacion Cas pa Comunidad Arubano (FCCA). Colaboracion di e magnitud aki ta refleha locual por logra ora gobierno, sector priva y comunidad traha hunto pa un vision comparti. Tur esaki ta fundamental pa logra renoba y revitalisa Aruba su centro di ciudad.

Durante e atardi tawata presente Minister President, Mike Eman, Minister di Enseñansa, Gerlien Croes y Minister di Finansa, Geoffrey Wever, Julie Wever y Giovanni Anthony, directornan di FCCA, Sue-Ann Lee, Rector di UA, arkitecto Raffy Kock y Contratista CH.

E dia aki ta marca un logro nobo y importante como desaroyo cu ta transforma e infrastructura y sostene crecemento economico a largo plaso den Oranjestad. Un celebracion di mas cu djis e inicio di e proyecto pa transforma e edificio aki den apartamento pa studiante den combinacion cu espacio comercial. Esaki ta inicio di revitalisacion y beneficionan pa futuro di nos comunidad.

“Cu e base aki, nos no ta djis renoba un structura, pero nos ta fortalece e futuro cu nos ta laga atras p’e siguiente generacion,” Minister Herdé a bisa.

E edificio aki ta representa compromiso pa un infrastructura solido, desaroyo sostenibel y planificacion di mañan.

E proyecto ta refleha e focus di gobierno pa construi un infrastructura moderno y resistente pa duna sosten na nos comunidad. Gobierno di Aruba ta sigui duna prioridad na inversion strategico di infrastructura cu ta promove economia resistente, sostenibel y di calidad rond nos isla.

Minister Herdé kier gradici Minister Wever pa su iniciativa y perseverancia cu a haci e proyecto aki, cu a nace durante e gabinete anterior, florece y bira un realidad actualmente. Alabes un palabra di danki ta bay na FCCA, UA, Contratista CH y arkitectonan pa nan sosten pa cu e proyecto.