Den cooperacion cu Unicef Hulanda, muchanan a traha video na Papiamento tocante derechonan di mucha

Shurman Milliard a laga sa:

ORANJESTAD (AAN): Unicef Kinderrechten Filmfestival ta un proyecto creativo pa muchanan di scol basico pa haya conocemento di derechonan di mucha. Señor Shurman Milliard kende ta un trahado social, hunto cu Unicef Hulanda, a haya e oportunidad pa traha riba e proyecto importante aki na Aruba. Mundialmente, Unicef Kinderrechten Filmfestival ta hopi grandi. 

Den e proyecto aki, muchanan a actua den videonan riba diferente tema cu nan ta haya importante, expresando nan mes pensamento y sintimento. E proyecto ta encurasha muchanan pa expresa nan mes den diferente manera creando diferente habilidad, entre otro, actua, canta, baila y traha y produci video. 

Señor Milliard a remarca cu e aña aki, Unicef Hulanda a pidi Kinderrechten Filmfestival pa traha un video tocante derecho di mucha den idioma Papiamento. El a menciona cu pa haci e video realidad, a envolvi un scol basico y Gucci Dancers. 

Meta di e video, segun señor Milliard, ta pa ilustra e presencia di derecho di mucha na Aruba y ta pa tur mucha. Tambe. un di e derechonan ta cu mester por tende di e derechonan den nos propio idioma. Y cu e proyecto aki, esaki a keda enfatisa tambe. 

Tin 51 nivel di derecho di mucha y tur caminda di mundo e ta diferente. Y ta importante pa nos sa y aprecia e derechonan aki y e habilidad cu cada pais ta duna.

Señor Milliard a duna di conoce cu e video ta wordo promovi door di Unicef y Kinderrechten Filmfestival riba nan canal di Youtube na unda cu mayornan por tambe pone di nan banda y dirigi nan yiunan na e videonan aki . Pero tambe, Señor Milliard ta pidi pa scolnan pasa e videonan aki den klas como parti di les pa siña e muchanan tocante e derechonan di mucha.

E mensahe cu señor Milliard tin pa nos muchanan ta pa nan wak e videonan aki y pa nan tambe crea y desaroya habilidadnan y uza nan pa apoya cosnan positivo.

E video lo ta disponibel riba canal di Youtube ‘Unicel Kinderrechten Filmfestival’ y riba plataformanan di Unicef.