Veld di SV San Luis Deportivo ta ricibi su luznan LED

Minister Gerlien Croes:

• Club ta celebrando 60 aña di existencia 

ORANJESTAD (AAN): Minister di Deporte, mr. Gerlien Croes, ta anuncia cu e instalacion di luznan LED na veld di S.V. San Luis Deportivo a keda culmina exitosamente y cu e veld awe ta completamente ilumina cu luznan LED moderno. E entrega di e proyecto aki ta marca un otro paso importante den e plan structural pa mehora infrastructura deportivo na Aruba.

   E instalacion di luznan LED na veld di S.V. San Luis Deportivo ta forma parti di e proyecto di iluminacion financia pa Lotto pa Deporte, cu como meta pa crea espacionan deportivo mas sigur, sostenibel, accesibel y funcional pa entrenamento y competencia. E proyecto ta enfoca riba duna mas oportunidad pa clubnan y comunidad, y specialmente pa nos muchanan, hobennan y adultonan cu ta traha riba nan desaroyo deportivo y di futbol tur dia.

   Entrega di e proyecto aki tin un nificacion special, pasobra diasabra ultimo, 7 di februari, S.V. San Luis Deportivo a cumpli 60 aña di existencia. Minister Gerlien Croes ta felicita e club cu e milestone importante aki y ta expresa su gradicimento na tur directiva y boluntarionan pa mantene e club fuerte y activo den comunidad.

   “Pabien na S.V. San Luis Deportivo pa 60 aña di historia y dedicacion. Danki pa e trabao cu boso ta haci pa e desaroyo deportivo di nos mucha-, hoben- y adultonan,”.

   Minister Gerlien Croes ta reitera cu Gobierno di Aruba ta sigui comprometi pa inverti den infrastructura deportivo na tur districto, cu un vision claro: crea condicionnan miho pa entrenamento, competencia y participacion comunitario. Deseando S.V. San Luis Deportivo tur clase di exito den e proximo campeonatonan y ta anima e club pa sigui cu e energia y determinacion cu semper a caracterisa nan.

Gobierno di Aruba ta gradici tambe tur partnernan y stakeholders, incluyendo sector priva, cu ta aporta pa realisa proyectonan manera esaki y pa sigui invirti den e futuro di deporte na Aruba.