Opendag di IPA lo bay ta riba diasabra 21 di februari 2026

ORANJESTAD (AAN): “Start your adventure here!”, esaki ta e tema di Instituto Pedagogico Arubano (IPA) su open dag 2026 cu lo tuma luga diasabra 21 di februari di 5:00 pm - 8:00 pm na IPA (Isaac Wagemakerstraat 11, San Nicolas).

   Riba e dia aki IPA ta habri su portanan pa tur persona cu kier descubri mas di e rol crucial y e influencia grandi di maestro den enseñansa. Nan kier pa tur persona, cu tin e pasion pa bira maestro, bin combersa cu nan y si bo ta explora opcion di estudio, join nan y laga IPA inspira bo.

   Durante e open dag nos lo duna informacion di diferente estudio: (*) E estudio pa Maestro di Enseñansa Primario.  (*) E curso di Certificacion Pedagogico Didactico (PDG). (*) E trayecto cortico pa Maestro di Enseñansa Primario cu ta hiba na un autorisacion pa duna les na tur alumno di scol preparatorio y scol basico.

   Tuma nota cu cada estudio tin su grupo meta y orario specifico pa por haya informacion: 

   (*) Estudio pa Maestro di Enseñansa Primario: E estudio pa Maestro di Enseñansa Primario ta forma maestro cu ta cualifica pa duna les na alumno di scol preparatorio y scol basico. Durante e open dag lo tin 3 sesion cu e bishitante lo por atende pa ricibi informacion di e estudio. E orario di Sesion 1 ta 5:30 pm, di Sesion 2 ta 6:35 pm y di Sesion 3 ta 7:40 pm. 

   Pa inscribi pa e estudio aki mester tin diploma di HAVO, VWO of MBO nivel 4 (of ta den examenklas di un di esakinan).

   (*) PDG: Esaki ta un curso pa profesionalnan cu ya caba ta dispone di un diploma riba nivel di bachelor of di master y cu kier continua nan carera den ramo di enseñansa. Pa medio di e curso di PDG e profesionalnan por desaroya competencia pedagogico y didactico. E orario cu bo lo por ricibi informacion general di e estudio aki ta 5:30 pm.

   (*) Trayecto cortico pa Maestro di Enseñansa Primario: E trayecto cortico pa Maestro di Enseñansa Primario ta un estudio specialmente desaroya pa maestronan cu ta trahando caba den scol preparatorio of scol basico y cu actualmente ta autorisa pa duna les na alumno di edad 4 - 8 aña of 6 - 12 aña. Cu e estudio aki nan por amplia nan autorisacion pa asina nan ta completamente cualifica pa duna les na alumno di 4 te cu 12 aña. E orario di e sesion di informacion ta 6:35 pm.

   IPA ta invita henter comunidad di Aruba, specialmente tur persona cu ta interesa pa haci un estudio na IPA pa asisti na nos open dag. Probecha di e oportunidad pa haya tur informacion personalmente y haci pregunta.  Bo aventura ta cuminsa na IPA.