Ta responsabilidad etico y moral di Gobierno pa pone fondonan disponibel pa resolve e problemanan di trahadonan di Arubus

Segun Magaly Brito di Seppa:

ORANJESTAD (AAN): E situacion di trahadonan di Arubus NV tin hopi tempo andandoo. Tabata tin varios intento pa remedia e situacion pero te ainda no ta mira un solucion. Di parti di Arubus, nan ta keda riba nan punto cu e compania no ta genera suficiente na e momentonan aki pa por paga debenan astronomico cu e compania a bin ta acumula durante diferente aña. Sinembargo, pa e trahadonan, esaki no por ta un excusa. Nan no tin control tampoco riba e manera cu e compania estatal aki, cu ta un compania di pueblo, ta wordo maneha.

   Señora Magaly Brito di Seppa, a duna di conoce cu na e momento aki, Sindicato Seppa ta wak cu trahadonan tin derecho. Nan tin derecho riba negosacion riba un contrato colectivo, sigur despues cu pa hopi aña tin esaki wanta. El a menciona cu ta precisamente pa e motibo cu e compania no ta generando suficiente, awo si e trahadonan tin tur derecho of mester por haya adelanto, no solamente den nan condicionnan di trabao pero tambe riba e hecho cu tin un discusion di bay bin riba un structura salarial cu e compania a impone, sin tene cuenta cu esaki ta hiba e trahadonan mas atras.

   Señora Brito a remarca cu Seppa a hiba dialogonan cu dos diferente minister den e ultimo dos gobiernonan. Den dialogonan cu Minister Arends, Seppa a haya rason riba e oponencianan. Ex minister Arends a busca un partido independiente cu a indica cu enberdad tur e structura salarial ta un tema di negosacion colectivo y un doño di trabao no por simplemente impone.

   Den e tempo aki, e compania a duna un solucion temporario cu ta duna oportunidad pa partidonan bay bek na mesa y explora e posibilidadnan pa yega na un solucion. Sinembargo, señora Brito a menciona, esaki no a sosode, pero e compania toch a impone loke e ta kere ta husto den su bista.

   Ex minister Arends a sugeri pa Arubus y Seppa sinta hunto pa bin na un solucion riba e diferencianan cu tin. Seppa a dirigi un carta na gobierno pa informa riba e posibel solucionnan. Y den nomber di gobierno, cu ta e unico accionista di Arubus, ex minister Arends a informa Seppa cu gobierno lo pone fondonan disponibel den presupuesto di pais Aruba pa Arubus soluciona e problemana di trahado.

   Despues cu a bin cambio di gobierno, Seppa a adverti gobierno cu esaki ta e compromiso cu a keda pendiente di e minister anterior pa cu e trahadonan y pa gobierno cumpli cu esaki. Pero, esaki no a sosode. Gobierno no a pone fondo disponibel pa soluciona e problema di trahadonan di Arubus. Y atrobe, Seppa ta pushando pa yega na un solucion.

   “E ta e responsabilidad etico y moral di pais Aruba pa pone fondonan disponibel pa resolve e problemanan cu tin diferente aña andando. Y no ta cuestion cu un dia pa otro trahadonan a lanta y exigi aumento. Nan tin hopi aña wardando pa un solucion final”, Señora Brito a finalisa ta bisa.