Diferente banda di berdad a toca ‘The Lizard Kacking’ durante Lighting Parade

Carnavalistanan a confirma esaki

ORANJESTAD (AAN): Den fin di siman por a tuma nota di diferente comentario di personanan cu a bay mira Lighting Parade na Playa, y a expresa nan disgusto cu casi nan no a tende e popular soca “The Lizard Kacking” resona nan dilanti a lo largo di e ruta di Avenida Milio Croes, Vondellaan, y Henny Eman Boulevard.

   Asina a cuminza plama e informacion, cu esnan cu a bay mira e Parada ta sinti comosifuera cu tur e bandanan cu a pasa nan dilanti a actua comosifuera a boycot e Soca ganador di 2026.  Hendenan a bisa cu nan a scucha hopi cancion nobo, siendo cu nan yiunan a bay mira Lighting Parade wardando anciosamente yegada di e cancion di The Lizard Kacking pa nan baila.  Pero nan a keda desapunta.

   Hasta esnan cu a mira e transmision di Telearuba, no a bin nota nada di e cancion “The Lizard Kacking” tocando, excepto Massive Brassband International.

   A ser splica, cu kizas pa malasuerte cierto area di e ruta lo no a tende ni un cancion di Lizard Kacking ta resona, pero segun raportahe di participantenan, nan bandanan musical enberdad a toca e cancion di Lord Lally.

   LISTA DI BANDA: Danki na comentario di diferente Carnavalista, aki DIARIO ta publica un lista preliminar di e bandanan cu positivamente a toca “The Lizard Kacking” den Lighting Parade na Oranjestad riba Diasabra anochi.

(*) Massive Brassband International.

(*) Solo Banda Show (4 biaha).

(*) Buleria.

(*) ‘N Fusion.

(*) D’Nova.

(*) NBO.

(*) Duro (3 biaha).

(*) Tsunami.

   No tabata posibel di haya comentario di tur grupo, pero aki por mira cu por lo menos 8 grupo di berdad a toca e cancion di Lord Lally durante Lighting Parade di Playa.