Polis a detene 20 hende durante e marduga y mainta di Jouvert Morning

ORANJESTAD (AAN): Diasabra marduga pa 4:00 am, e tan spera y gusta parada di Jouvert Morning Pajamas Parade a tuma lugar den cayanan di San Nicolas.

  El a sali for di Joe Laveist Sportpark y a finaliza mesun caminda.  Pa 7:40 am e cabez di parada a yega Joe Laveist bek, y pa 8:51 henter e parada a yega su final.

   E marduga y mainta aki, henter Cuerpo Policial Arubano tabatin 125 personal riba pia. Diferente departamento di Cuerpo Policial a traha hunto entre otro Mobiele Eenheid, Flex Team, Polis Uniforma, Departamento di Recherche, Personal administrativo, Departamento di trafico y planologie, AE, K9 Unit, Mobiel Commando y OCC como tambe personal di CEA.

   Vocero policial Liliana Rasmijn a confirma na DIARIO, cu henter e parada e aña aki, a produci un saldo di 20 persona cu a keda deteni, y esaki pa diferente motibo.

   Algun hende a keda deteni pasobra a haya droga den nan poder.  Tabatin cu a wordo haya cu arma blanco den nan poder.  Otronan a keda deteni debi na bringamento, tambe casonan di buracheria, y otronan cu no a sigui ordo di Polis.

   E cantidad di detencion di awor na 2026, ta igual cu e cantidad di detencion aña pasa na 2025, pues mesun 20 detencion.