Corte di Husticia a atende caso di traficacion di cocaina likido den boter di Ensure

Hues a duna castigo di 18 luna pa uno di nan

ORANJESTAD (AAN): E hombernan J.d.l.S.L. y J.A.K. riba Diahuebs mainta a wordo haya culpabel di ta meti den traficacion di cocaina pa Hulanda. Fiscal a exigi castigo combina pa J.A.K., kende a transporta e droga y 3 aña di prison pa J.d.l.S.L., kende Fiscal ta considera e organizador. Hues, despues di a scucha defensa di e abogadonan, a dicta sentencia y a baha e castigo exigi pa Fiscal. Esaki pasobra Hues a mustra cu e cocaina den e boter Ensure ta 2.4 Kilo pero segun ley mester reduci esaki.

   Exporta cocaina: E acusacionnan cu Fiscal a presenta contra J.d.l.S.L. y J.A.K. ta, cu riba 12 Maart 2024 a exporta cocaina. Tambe Fiscal ta acusa J.d.l.S.L. di exportacion di cocaina den e periodo di 7 Maart 2024 y 25 April 2024.

   Hues a mustra cu J.A.K. a admiti di a exporta cocaina via DHL den un pakete. Hues mustra cu segun relato di Polis, J.A.K. a bisa cu e tabata sa cu tin cocaina den e pakete y cu e lo a haya 500 Florin pa haci esaki y cu el a haya solamente 300 Florin. Den e pakete tabatin boternan di Ensure. El a bisa cu el a haci esaki pa Giovanni kende ta J.S.L. Ariba pregunta di Hues, J.A.K. a bisa cu el a hacie pa placa.

   Hues a puntra J.d.l.S.L., si e ta envolvi. El a desmenti y bisa cu e no tin nada di haci cu esaki. Hues a bisa cu J.A.K. a bisa cu si. El a desmenti di a duna J.A.K. un pakete pa manda. Segun J.d.l.S.L., e no conoce J.A.K. Hues a sigui bisa cu J.d.l.S.L.. tabata envolvi den preparacion di manda droga den e periodo di 7 Maart 2024 y 25 April 2024. Dia 25 April 2024, J.d.l.S.L.  lo a hiba e homber V. aeropuerto. E homber V. a wordo gara na aeropuerto cu cocaina den maleta. E intencion tabata pa hiba e droga Hulanda. V. a bisa cu ta J.d.l.S.L. a mand’e. J.d.l.S.L. a nenga esaki tambe. Segun J.d.l.S.L., e conoce V. for di chikito. Hues a remarca si J.d.l.S.L. no tin nada di haci cu e casonan aki, pakico J.A.K. y V. ta bisa su nomber. El a bisa cu 25 April 2024 e tabata na Hulanda. Hues a bisa cu V. a declara cu J.d.l.S.L. ta na Hulanda pa ricibi e droga for di dje. J.d.l.S.L. a bisa cu e no tin nada di haci den e mundo di droga.

   Hues a mustra cu J.A.K. ta usa droga y segun raport di Reclasering, J.A.K. mester di tratamento. Segun J.A.K., e mes por controla. Hues a bisa cu segun Reclassering, J.A.K. a papia cu un psicologo caminda ta mustra cu e ta menos responsabel pa su actonan y cu e mester di tratamento. Hues a bisa cu J.A.K. a keda 105 dia sera pa e caso aki y despues laga liber. Hues a bisa cu J.d.l.S.L.  tabata sera pa un caso di droga ora di interogacion di e caso aki y a wordo declara liber pa e caso e caso di droga cu tabata sospech’e. Pa e caso aya e tabata encarcela mas o menos 6 luna y despues declara liber.

   Fiscal: Fiscal a bisa cu dia 12 Maart 2024, J.A.K. a hiba un pakete DHL pa manda Hulanda. E cacho anti droga a reacciona riba esaki, caminda a haya boternan di Ensure cu cocaina liquido. En total e boternan a pisa 2.4 kilo di cocaina. Fiscal a sigui bisa cu J.A.K. a bisa cu ta J.d.l.S.L. a mand’e. Riba video di DHL a mira auto di J.d.l.S.L. a hiba J.A.K. Fiscal a bisa cu segun J.d.l.S.L. e auto ta di su pareha y ta huur e auto. Segun Fiscal, J.d.l.S.L. a bisa Polis, cu e no sa cu kende el a huur e auto pasobra e papelnan ta na Hulanda. Fiscal ta haya J.d.l.S.L. culpabel di complice di exporta cocaina.

   Den e caso di e homber V., Fiscal a bisa cu V. a wordo gara cu 7 Maart 2024 cu mas o menos 900 gram di cocaina. V. a bisa cu el a hacie mas biaha pa J.d.l.S.L. Riba camera na aeropuerto a mira e auto di J.d.l.S.L. a baha cu V. Fiscal a mustra cu na April 2024 tambe V. a hiba droga. Fiscal a bisa cu tin dos declaracion y imagen riba camera caminda ta mira e auto di J.d.l.S.L.

   Fiscal a exigi pa J.A.K., 18 luna di prison di cual 116 dia ta condicional y cu 2 aña di prueba y bou guia Reclassering. Tambe Fiscal a exigi 100 ora di trabao pa comunidad y si no cumpli lo mester bay 50 dia di prison.

Fiscal a exigi pa J.d.l.S.L. como organizador di transporte di droga, 3 aña di prison.

   Abogado: mr. Faarup a bisa Hues cu J.A.K. a admiti tur cos y a mustra cu ta J.d.l.S.L. a mand’e. Den e boternan di Ensure tabatin cocaina likido. A haya 2.4 liter y ta considera cu ta 2.4 Kilo di cocaina. E abogado a mustra cu segun ley, mester reduci esaki y ta menos cu e 2.4 kilo, esta 900 gram. Abogado a mustra e situacion di salud di J.A.K., kende segun psicologo e ta menos responsabel y mester haya tratamento psikiatrico. E abogado a bisa Hues cu cosnan ta bayendo bon cu J.A.K. actualmente. E abogado a pidi Hues pa duna un castigo menos cu Fiscal a exigi y un tempo di prueba cu guia di Reclasering.

1. Edwards a bisa Hues cu J.d.l.S.L. ta wordo sospecha di a organiza transportenan di droga. E abogado ta haya cu no tin prueba cu ta J.d.l.S.L. tabata stuur e auto cu a hiba V. aeropuerto. E abogado no ta haya cu investigacion ta mustra otro puntonan cu J.d.l.S.L. ta envolvi. E abogado a bisa Hues cu J.d.l.S.L. a bisa Polis cu e tabata huur auto. Pa loke ta e caso di DHL, J.A.K. a bisa cu ta J.d.l.S.L. y a duna descripcion. J.d.l.S.L. a mustra Polis cu e no tin tattoo full sleeve na man drechi y tampoco ta hunga futbol manera J.A.K. a bisa.

   E abogado a remarca cu e descripcion di J.A.K. por ta otro hende tambe. E abogado a cuestiona e hecho cu Polis a confronta J.A.K. cu un potret so di J.d.l.S.L. y no a mustra diferente potret di diferente persona y pa J.A.K. mustra ta ken ta J.d.l.S.L. Abogado a conclui cu no por prueba cu J.d.l.S.L. ta envolvi den transporte di droga. Den caso V., e abogado a mustra cu na April 2024, J.d.l.S.L. a bay Hulanda y a bolbe na Mei 2024. Ora el a yega el a wordo deteni y a wordo declara liber di e acusacion di droga. E abogado ta haya cu no tin prueba cu ta J.d.l.S.L. a organiza transporte di droga. El a bisa cu J.d.l.S.L. a hiba V. aeropuerto pa V. viaha pa Hulanda. El a desmenti cu el a manda V. hiba droga.

   Na opinion di abogado, na Maart 2024, ta un auto blauw a hiba V. aeropuerto y no tin investigacion riba esaki. E abogado a sigui bisa cu V. no a bisa Polis cu ta J.d.l.S.L. a dun’e droga. Polis no a haci investigacion di kende e droga tabata. Abogado ta haya cu e investigacion ta incompleto. E ta haya cu V. mes ta envolvi den transporte di droga pa haya placa. Abogado ta haya cu mester declara J.d.l.S.L. liber pa e dos acusacionnan. El a mustra cu nunca J.d.l.S.L. a wordo condena pa droga. El a pidi Hues pa no sigui Fiscal su exigi.

   Sentencia: Hues a pospone e caso un rato pa studia y a bolbe y dicta sentencia. El a cuminsa cu J.A.K. y a bisa cu J.A.K. a admiti. Pa cu e castigo, Hues a bisa cu droga ta causa hopi tristeza y adiccion. Tambe cu droga ta causa hopi criminalidad. Hues a bisa cu e ta tene cuenta cu Hof su orientacion pa cu e castigo. El a mustra cu e 2.4 kilo cocaina likido, segun orientacion di Hof mester kita 40 porciento di e peso ta mas o menos 900 gram. Hues a sigui bisa cu e ta tene cuenta tambe cu J.A.K. ta menos responsabel segun psicologo. Hues a bisa cu J.A.K. ya a sinta 105 dia y no ta e  intension pa bay sera J.A.K. atrobe. Hues a condena J.A.K. na 360 dia di prison di cual 255 dia ta condicional cu 2 aña di prueba. E castigo cu condicion cu J.A.K. ta cay bou guia di Reclassering. Ademas Hues a condena J.A.K. na 40 ora di trabao of 20 dia sera.

   Den caso J.d.l.S.L., Hues ta haya legalmente proba cu J.d.l.S.L. ta envolvi den e traficacion di droga. Apesar di e defensa di abogado, Hues ta haya cu e declaracion di V. y J.A.K. ta confiabel y no kere cu ta V. tabata organiza cosnan y ta tira culpa riba J.d.l.S.L. sin motibo. Hues a bisa cu e ta sigui orientacion di Hof. Door cu ta cocaina likido ta menos, e ta calcula 2 kilo total cu ta menos cu Fiscal bisa. Hues a condena J.d.l.S.L. na 18 luna di prison di cual 9 luna ta condicional cu 2 aña di prueba.