Fabuloso Lighting Parade tabata yen di ambiente

Un sinfonia di color, luz, musica, ritmo, elegancia y alegria

ORANJESTAD (AAN): Simplemente fabuloso e Lighting Parade diasabra anochi, cu a habri cu e presentacion espectacular di un steel band, cu su integrantenan luciendo un luhoso costume, y asina a prepara e espacio pa e ocho gruponan cu a participa.

   A start cu TOB Carnival Group cu su tema Las Vegas, yen di glamour. El a consisti di cuater seccion, y tres banda musical. Un grupo sumamente luhoso, representando e mundo di casino y un hotel iconico di Las Vegas. Den su carozanan a briya su reinanan, señora carnaval, mr. Universe, y mucho mas cu a ranca e aplausonan ferviente di e publico den cada seccion y sigur un grupo cu a causa furor ta e grupo di Hospital.

   Como grupo 2, a sigui Dushi Carnival Group, anima musicalmente pa banda Duro. Den su caroza a luci e bunita Reina Hubenil di Aruba su Carnaval, Kira, cu a ricibi hopi aplauso bon mereci, pa su buniteza, gracia y simpatia, acompaña pa su balarinanan. Tambe un grupo grandi, luhoso costume, colorido y bunita.

   Grupo 3, Champagne, tambe a consisti di diferente seccion. Sumamente creativo, cu su ingenioso caroza cu no ta move via hende, sino pa medio di un camera. Su tema, cu tabata e Gran Circo, a capta hopi aplauso, cu tur e elementonan cu un circo incluyendo e carpa, tin. Hopi participante mes.

   Empire a bira e di 4 grupo acompaña pa e banda musical Buleria. Un grupo cu mas di 500 participante riba caya. Iluminara ta nan tema, cu cual ta opaca e scuridad cu tin na mundo awendia, cu tanto cos no bon cu ta sosode. Tremendo costume y un ambiente sublime nan a trece cu ne.

   E di 5 grupo, Los Laga Bay, acompaña pa Robert y su Solo Banda Show, manera yen di ambiente y colorido, trahenan luhoso, y e integrantenan di e banda a baha canta y balia riba caya, loke a lanta e calor carnavalesco cerca e publico, ainda mas. Participantenan ta feliz cu durante henter e parada, e banda musical a toca ‘The Lizard Kacking” un total di 4x biaha.

   A sigui e di 6 grupo, HEPA Carnival Group. Un grupo relativamente chikito, pero cu tambe a mustra cu nan tey pa sigui crece y keda. El a wordo acompaña pa e banda musical Elite.

   Como di 7 grupo tabata Colours Carnival Group, cu a bin cu su concepto di DJ, pa move e masa y trece nan ambiente di alegria. A clausura cu e di 8 y ultimo grupo Royal Carnival Group, acompaña musicalmente pa NBO. Den su carosa a impresiona e bunita Señora Carnaval, ken ta docente na Colegio EPI y a representa henter e Colegio. Cu Aruba a goza su Parada di Luz, di Carnaval 72, sigur cu si!

  Finalmente Last Lap a wordo anima pa grupo Youth Xtreme y publico a goza di dje.