Cuerpo Policial awo tin dos comisario nobo

ORANJESTAD (AAN): Diaranson mainta, Cuerpo Policial Aruba (KPA) a celebra un ceremonia special durante cual Minister di Husticia, mr. drs. Arthur Dowers, a huramenta dos miembro di Cuerpo Policial como comisario di Polis.

Ta trata aki di mr. Silvio de Mey y Adrick Croes, dos profesional cu un trayecto impresionante y di hopi aña di experencia den e organisacion policial.

Durante su discurso, Altocomisario Ramon Arnhem a repasa e carera profesional di ambos comisario nobo y a expresa su gradicemento na famianan di nan pa e comprension, sosten y apoyo constante durante nan carera como Polis.

Silvio de Mey a drenta Cuerpo Policial na edad di 18 aña y a cuminsa su carera den Korps Politie Nederlandse Antillen como Aspirant-Agent. Dia 1 di januari 1986, el a haya e oportunidad pa traha riba un di e otro islanan di Antiyas, pero a scohe conscientemente pa keda sirbi su pais Aruba. El a cuminsa su trabao den Sectie Surveillance Dienst Buitendistricten y a sigui forma parti di diferente departamento den KPA, entre otro Sectie Surveillance Dienst, Jeugd en Zeden Politie y Bureau Interne Zaken en Onderzoek.

Como Onderinspecteur Eerste Klasse y cu su titulo di Meester in Rechten, de Mey a sigui su formacion na Nederlandse Politie Academie, caminda el a gradua na aña 2012 cu e titulo di Executive Master Tactical Policing (EMTP). Desde e tempo ey, el a ocupa diferente funcion, incluyendo Inspecteur, Inspecteur Eerste Klasse, Hoofdinspecteur y recientemente como waarnemend Comisario di Polis.

Adrick Croes tambe ta un figura bon conoci den KPA. El a cuminsa su formacion na Nederlandse Politie Academie na aña 2000 y na 2004 a drenta KPA como Inspecteur. Den apenas dos aña, el a subi di rango y bira Inspecteur Eerste Klasse. Desde 2008, Croes ta ocupa e funcion di Hoofdinspecteur di Polis y a eherce diferente posicion clave, manera Hoofd Informatie & Expertise, Hoofd Bijzondere Diensten, Portofeuillehouder Arrestatieteam, Hoofd Grensbewaking y Districtschef di Santa Cruz y San Nicolas.

Cu e huramentacion di Silvio de Mey y Adrick Croes como comisario, Cuerpo Policial Aruba ta fortifica su liderato y ta sigui inverti den experencia, conocemento y compromiso cu seguridad y bienestar di comunidad Arubano.

Minister di Husticia Arthur Dowers a felicita Cuerpo Policial cu e logro aki di dos miembro ehemplar, awo den funcion como Comisario di Polis. Ademas e mandatario di Husticia a gradici esnan presente pa nan dedicacion y esfuerso pa mantene e integridad di Cuerpo Policial halto.