Corte di Casacion lo dicta sentencia aki dos luna na Hulanda

Decision riba caso Avestrus cu ta envolvi ex-Ministro Sevinger

ORANJESTAD (AAN): Riba Diamars, Abogado-General a conseha Corte di Casacion (‘Hoge Raad’) pa mantene e condena di Corte duna anteriormente contra ex-Minister di Desaroyo Espacial, Infrastructura y Medio Ambiente, esta Benny Sevinger, den e caso ‘Avestrus’.

   Na aña 2024, Corte Comun di Husticia a condena e ex-Minister pa complicidad di estafa di Pais Aruba, corupcion pasivo y malversacion.

   Tambe pa loke ta e dos otro sospechosonan, cu a wordo condena door di Corte Superior (entre otro) pa soborno (‘omkoping’) di e minister, Abogado-General a conseha Corte di Casacion pa mantene nan condena.

   Corte di Casacion (‘Hoge Raad’) lo dicta riba 14 di april venidero.

   E dictamen di Abogado-General ta trata un analisis huridico independiente di e caso. Hoge Raad no ta mara na tuma e conseho aki, aunke den practica e tin hopi peso y ta wordo sigui regularmente. Sinembargo, Hoge Raad por kita di dje.

   Avestrus ta un caso serio, cu acusacionnan grave contra e ex-Minister Sevinger. Su actonan a kibra y a mina profundamente e confianza cu sociedad por tin den un gobierno cu ta funciona cu integridad.

Corte Superior (‘Corte Comun di Husticia’) a condena Sevinger pa un castigo di prison di 48 luna, di cual 12 luna ta condicional y un tempo di prueba di 3 aña. Ademas el a wordo despoha di su derecho pa presenta su candidatura pa un cargo politico y a perde su derecho pa tene cualkier cargo publico pa un periodo di 5 aña di tempo.

   Ademas ta asina cu na 2025 Corte den Prome Instancia a dicta sentencia den e procedimento di decomiso (‘ontnemingsprocedure’) cu Ministerio Publico a hiba contra e ex-minister, y a bay de acuerdo cu ta confisca e suma di 840.000 Florin.