Polis a detene dos sospechoso den dos entrada hudicial

 *A confisca varios arma di candela y cantidad grandi di droga

ORANJESTAD (AAN): Cuerpo Policial ta informa cu den luna di januari 2026 departamento Atraco Team yama como (Team Bijzondere Projecten) a tene dos entrada hudicial riba diferente dia y den diferente adres. 

Ta trata di un investigacion andando y na unda cu a haci detencion y confisca varios arma di candela, municion y gran cantidad di droga.

Dia 19 Januari 2026, Team di Aresto a haci un entrada hudicial na un cas na Boliviastraat. Durante e entrada hudicial a detene e homber di inicial N.R.R. naci na Hulanda di 27 aña, na unda agentenan a confisca un revolver y un cantidad di droga.

Riba 20 januari 2026, Team di Aresto a haci un entrada hudicial na un cas na Caya Frere Henricus. Na e entrada hudicial, e agentenan a detene e homber di inicial B.A.B. naci na Aruba di 35 aña. Tambe a confisca varios arma di candela, municion y un gran cantidad di droga.

Un tremendo trabao di departamento di TBP cu a traha incansablemente pa pone man riba e sospechosonan.

Cuerpo Policial Aruba ta keda haci un apelacion na nos comunidad cu a wak algo of sa algo pa yama e tiplijn di polis cu ta 11141. Bo ta keda anonimo.