Homber acusa di violacion ta wordo declara liber

Den Corte

ORANJESTAD Dialuna mainta e homber Colombiano di inicial C. di 55 aña a presenta den Corte pa scucha decision di Hues den e caso penal cu Ministerio Publico a cuminsa contra C.

   Fiscal ta haya C. culpabel di riba 14 Maart 2024 a haci viola un dama H. y a haci actonan inmoral. Fiscal a exigi 3 aña di prison. Hues a bisa cu e tin duda si realmente tabatin violacion y pesey ta declara C. liber. Por a mira cu C. su wowo a yena cu awa di alegria.

   Viola: Tratamento di e caso a tuma lugar dia 12 Januari 2026. Durante e interogacion di Hues, C. a bisa cu e conoce e dama H., kende a bin for di Hulanda na November/December 2023. E dama H. a bay keda den un apartamento cerca C. Segun C. nan a conoce otro pa un tempo y tabatin un relacion amoroso.

   Hues a bisa cu H. a declara na Polis cu nan tabatin relacion sexual y hasta un dia promer cu 14 Maart 2024.  E acusado C. a bisa cu dia 14 Maart, el a haci aña y nan a planea pa bay sali.  Pero H. a yega laat y C. a prepara un rum coke. Despues nan a bay come y bebe algun bebida alcoholico. Despues nan a bay cas bek.

   Segun C. na cas el a bay masashi H. y H. a sali sunu for su camber. Hues a bisa cu e victima H. a bisa cu ta C. a kita su paña y masashi.  Segun C. e no a forza y tampoco a viola H. El a bisa Hues cu na dado momento e tabata kier tin relacion sexual pero H. a lanta para y bisa cu no y cana bay pa su camber.

1. a bisa cu e no a haci nada. H. a bay den camber y C. a keda den sala. Despues di algun dia, H. a piki tur su cosnan y a bay for di e cas.

   Hues a bisa cu loke C. ta splica ta cuadra basta cu loke H. a declara na Polis. Hues a mustra cu H. a bisa cu ora el a duna C. un “no”, C. a sigui toch y a tene relacion sexual cun’e. E dama H. a keda bisa cu e no kier y e ora ey C. a stop.

1. a bisa Hues cu algun dia despues H. a bis’e cu e dia 14 Maart 2024, el a haya un flash bek di algo cu a sosode den pasado cu un otro homber. El a bisa cu e homer a tene relacion sexual cun’e sin cu e tabata kier. Hues a bisa cu e punto cardinal ta si C. a forza H. pa tin relacion sexual. Ta asina cu te na April 2024, H. a haci denuncia, ora cu C. tabata busca contacto cun’e pa drecha relacion. 

   Fiscal a exigi 3 aña di prison: Fiscal a bisa Hues cu e ta haya cu e declaracion di H. ta cuadra cu loke el a bisa su amigonan.  E dama H. a bisa di tabatin relacion sexual cu C. pero a para esaki y tin amistad cu C.

   Dia 14 Maart 2024, apesar cu e dama H. a bisa e homber C. pa stop, C. a sigui. Ta ora cu H. a cuminsa yora, e ora ey e homber C. a stop.

   Fiscal a bisa cu e amistadnan di H. a bisa cu dama H. a declara na nan cu el a wordo viola y tabata hopi emocional. Fiscal ta haya cu tin prueba di sosten. El a bisa cu e declaracion di C. ta confirma loke a pasa. Tres dia despues di e sucedido, H. a bay for di e cas. Fiscal a exigi 3 aña di prison.

   Abogado ta haya cu no tin prueba: Abogado mr. Illes a bisa Hues cu no tin ningun prueba di violacion. Ta solamente e declaracion di e dama H. tin. Abogado ta haya cu emocion no mester influencia husticia pa castiga un sospechoso. Emocion ta un reaccion di un persona y no un prueba. E abogado ta haya cu tin duda den declaracion di H. El a mustra cu C. y H. tabatin relacion cu otro y nan tabata hunto den cas di C. Na opinion di abogado, ta H. mes a kita su paña y bay drumi riba cama di masashi. No tabatin forzamento y tampoco penetracion.

   Ora cu C. kier tabatin relacion sexual, H. a bisa no y C. a para keto. E abogado a mustra cu H. a keda bay na unda C. tabata traha y esey ta pone uno pensa, si realmente H. a wordo viola, pakico e tabata keda bay unda C. tabata traha? E ta haya cu H. a duna declaracion dudoso. El a mustra cu C. tabata habri y no a sconde nada. El a bisa cu e tabata kier tin relacion sexual pero a stop ora cu H. a bisa stop. Abogado ta haya cu no tin prueba di sosten y cu mester declara C. liber. E abogado ta haya cu tin duda kico realmente a sosode.

   Sentencia: Hues a bisa cu e acusacion di violacion ta hopi serio. Den casonan asina ta dos persona tin, e sospechoso y e victima. Hues a bisa cu ley ta bisa cu no por bay tras di declaracion di e victima so. Mester busca pruebanan di sosten. Hues a sigui bisa cu apesar cu tin pruebanan, mester tin pruebanan convicente.

   Na opinion di Hues, loke ta sobresali den e caso aki ta tanto C. y H. tabatin relacion cu otro. H. a bay biba cerca C. y nan tabatin relacion sexual cu otro. Dia di e incidente, H. a bay drumi sunu riba cama di masashi y C. tabata mishi cun’e. H. ta bisa cu tabatin relacion sexual sin cu e tabata kier. Hues ta haya cu no por saca afor kico exactamente a sosode.

   No por saca afor si e homber C. a tene relacion sexual contra e deseo di H. Tin prueba di sosten cu e dama H. tabata emocional pero esaki no tin di haci cu e relacion sexual sino cu otro cosnan cu a conduci cu el a bira emocional. Hues a bisa cu den e caso aki, e no por bay scoge. Hues a bisa cu e tin duda y ta declara C. liber. Por a mira cu C. su wowonan a yena cu awa di alegria. Hues a bisa C. cu mester warda wak su Fiscal lo apela e sentencia.