Prome Minister a entrega mando di Carnaval 72 na Monarcanan 2026

ORANJESTAD (AAN): Diadomingo 1 di februari, Carnaval 72 a ranca sali oficialmente, despues cu Prome Minister Mike Eman a ricibi e monarcanan di Carnaval 2026 na Bestuurskantoor,

y a tuma luga e tradicional traspaso di mando. Durante e ceremonia simbolico, Prome Minister a entrega e yabi di Carnaval, pa duna asina e monarcanan e mandato pa dirigi, tuma rienda y guia e celebracion cultural mas grandi di Aruba.

   E traspaso di mando ta un tradicion cultural, caminda Gobierno di Aruba simbolicamente ta confia e liderazgo di Carnaval na mannan di e monarcanan, reconociendo nan rol como embahadornan di alegria, identidad y union den comunidad.

   Den su mensahe, Prome Minister a enfatisa cu Carnaval no ta solamente fiesta, sino tambe responsabilidad comparti. El a haci un yamada na henter comunidad pa cuida nos muchanan, tene precaucion cu uso di alcohol, promove trafico sigur, y mantene comportacion respetuoso durante y despues di paradanan. Tambe a subraya e importancia di tene cuenta cu nos adultonan mayor y di mantene limpiesa di e rutanan durante henter e periodo di Carnaval.

   Nos monarcanan di 2026 ta Reina Infantil Amelie Koolman, Reina Hubenil Kyra Jong, Reina Grandi Gabriela Croes, Señora Carnaval Marylain Kock, Prins y Pancho Infantil Kirenzly Petit Prins Ami y Maison Gotze Pancho Abo, Prins y Pancho Hubenil Leandray Gomes Prins Ma y Jeaven Lanting Pancho Bisabo, Prins y Pancho Grandi Shaundrik Ventura Prins Los y Jerwin Mercera Pancho Eeeee, Prins y Pancho Adulto Jairo Maduro Prins Lanta Para y Tyson Croes Pancho Boso por sinta.

   Monarcanan di SMAC 2026 ta Rey di Tumba Infantil Jaymerson Kelly, Reina di Tumba Hubenil Melody Franken Children Calypso King Ashandric Richardson, Children Roadmarch Queen Adeliza Henriquez, Youth Calypso Queen Caylee Pietersz, Youth Roadmarch King Brayden Elisabeth, Rey di Tumba Loco Gino Petrocchi, y Rey di Tumba Roderick Franken

   Den e espirito di common good, Prome Minister a comparti su deseo na e monarcanan pa Aruba, entre nan: (*) Un cancha deportivo den cada bario, (*) cuido y respet pa nos grandinan, (*) renobacion di tur scolnan riba nos isla, (*) y fortalece siguridad den trafico.

   Segun Premier Eman, tur esaki ta parti di un vision pa un Aruba mas fuerte, mas solidario y mas humano. Confiando plenamente den e monarcanan, el a entrega nan e mandato cu tur confianza pa representa e pueblo durante Carnaval 2026.

   Despues cu Prins y Pancho Infantil a lesa nan decreto, Prome Minister a entrega e machete simbolico. Prins y Pancho Hubenil a ricibi nan spada, mientras cu Prins y Pancho Adulto y Prins y Pancho Grandi a ricibi e yabi, simbolisando nan rol como lidernan di Carnaval.

   Prome Minister a felicita tur e monarcanan y a expresa su gradicimento na SMAC y na tur boluntario, organizador y partner cu ta haci Carnaval di Aruba posibel cada aña. El a conclui cu un yamada na henter pueblo pa traha hunto pa haci di Carnaval 72 esun di mas grandi na mundo.