Common Good Conference ta pone bienestar comunitario den centro di maneho y accion

Fraccion AVP:

ORANJESTAD (AAN) - Fraccion di AVP ta mira cu gran satisfaccion riba e exito di e prome edicion di e Common Good Conference, cu a tuma luga e siman aki na Aruba. E conferencia a crea un plataforma balioso pa dialogo, conexion y aprendisahe, unda miembronan a tin e oportunidad pa intercambia idea cu academiconan reconoci, politiconan for di diferente parti di Reino, y exponentenan local riba e tema central di bienestar comunitario.

   Durante e diferente sesionnan, e participantenan por a profundisa nan conocemento riba e retonan actual cu nos comunidad ta enfrenta, y na mesun momento, explora solucionnan concreto pa fortalece cohesion social y calidad di bida na Aruba. E interaccion directo cu expertonan di tanto nivel a confirma e importancia di colaboracion entre politica, academia y comunidad.

   Hopi significativo tabata tambe e participacion di e miembronan di Fraccion AVP na Common Good Expo, cu a tuma luga Diahuebs atardi na Renaissance Conference Center. Mas cu 50 organizacion social local a participa, dunando oportunidad pa papia directamente cu esnan cu ta traha tur dia “riba e veld” y pa comparti nan experiencia tocante e situacion actual riba e isla. E expo a sirbi como un brug importante entre maneho y practica social.

   Colega parlamentario di AVP, Clifford Heyliger a forma parti di un di e panelnan di discusion, unda hunto cu otro lider local a reflexiona riba e esencia mes di e encuentro: traha pa e bon comun cu accion concreto, no solamente cu palabra.

   E conferencia a demostra claramente cu no tabata un evento di “hopi palabra y poco accion”. Durante e siman a firma varios Memorandum of Understanding (MOU), entre nan pa e creaccion di buurtcommissies y pa e programa nacional di reforestacion, entre otro iniciativanan importante cu lo tin un impacto positivo y duradero pa pueblo di Aruba.

   Fraccion AVP ta expresa su gran aprecio pa Gabinete AVP/Futuro pa e excelente iniciativa aki, y en particular pa Prome Minister Mike Eman, pa su liderato y vision den organiza un evento cu ta pone bienestar comunitario den centro di agenda nacional.

   Nos ta convoca tur parti involucra pa sigui traha hunto, pa traduci tur e bon boluntad, conocemento y compromiso cu a surgi for di e Common Good Conference den un realidad cada dia mas miho pa nos dushi isla di Aruba.