Trio local 297 Strings a lansa produccion nobo di musica suave instrumental

ORANJESTAD (AAN): Un trio musical cu sigur ta haci falta den ultimo temponan cu e musica suave instrumental cu instrumentonan manera cuarta, baho y mandolin, treciendo e zonido crioyo di Aruba.

   Aki DIARIO ta referi na e trio Jeremy Dijkhoff riba cuarta, Rubin Ponson cu su mandolin y Ivan Croes tocando e baho ta formando e trio “297 Strings” cu ta representa “Cuerdenan di Aruba”.

   E motibo di e nomber ingles ta cu e trio a lanta cu e concepto pa toca den lugarnan sera y chikito manera restaurant of hotel, pa sigui trece e musica di Aruba cu no ta zona muchu mas pa nos turistanan.

Pero tambe nan a presenta den diferente actividadnan local manera di comemento, na biblioteca nacional, den Cas di Cultura y tambe na hotel y restaurantnan, y hasta algun biaha a wordo solicita na Curaçao pa presentacionnan.

   E trio aki a lanza nan promer produccion na aña 2020 y durante añanan a lanza 3 produccion di cancionnan clasico y popular, tanto di nos mes ritmonan y tambe cancionnan internacional.

Na 2023 tambe a lanza un produccion titula “Noche Buena” cu varios cancion clasico di Pasco.

Awor den luna di Januari 2026 den e temporada di carnaval ta lansa nan di 4 produccion “Cuerdenan di Aruba” cu 8 tema musical riba dje cu diferente cancionnan y e biaha aki mester bisa cu loke ta interesante den e produccion aki ta cu mayoria ta cancionnan crioyo di composicionnan nobo.

   Riba e produccion aki por scucha cancionnan clasico manera “El Bodeguero”, “Alma llanera” y un potpuri di cancionnan arubiano pa temporada di dianan nacional. Pero tambe tin ritmonan crioyo den composicionnan nobo manera, “Cuerdenan di Aruba”(danza), “Linda”(wals), “Saturno”(calypso), “Soraida”(wals) y “Kenepa”(tumba) cu ta e cancion promocional cu tin un videoclip tambe riba YouTube.

E motibo di lanza e produccion aki ta pa Aruba tin mas di nos musica tradicional zonando den nos hogarnan.

   E trio “297 Strings” ta masha orguyoso di locual e por presenta y ta keda para pa defende nos musica y laga esaki sigui resona pa nos localnan y tambe turistanan cu ta desea di scucha loke ta di nos.

   E produccion aki ta obtenibel riba USB memory stick cerca e integrantenan of tambe por manda WhatsApp pa Linda na 730-1214.

   E trio ta spera di por conta cu e sosten di nos comunidad pa por sigui mantene locual ta di nos, y tambe ta spera di por alegra un biaha mas e dianan nacional cu nos semper sa di celebra.