Aruba ta lansa programa Smart Justice ‘Buddi’ pa monitoreo electronico den sistema hubenil

Charlotte McInerney encuanto enkelband...

ORANJESTAD (AAN): Aruba a tuma un paso importante den modernisacion di su sistema di husticia cu e lansamento oficial di e programa di monitoreo electronico, Smart Justice “Buddi”, den sector hubenil.

   Señora Charlotte McInerney, Business Development Manager, a expresa su satisfaccion cu nan a wordo scogi pa brinda solucion y apoyo na Aruba den e iniciativa importante aki. “Nos ta hopi contento cu nos a wordo scogi pa brinda nos solucion y apoyo na Aruba pa e lansamento nobo di Smart Justice – Buddi. Cu mas di 20 aña di experiencia den monitoreo electronico, incluyendo den Caribe Hulandes, nos ta bon posiciona pa sostene e programa aki,” McInerney a bisa.  E aparato Buddi ta procedente di un compania di Inglatera.

   Introduccion di monitoreo electronico den sistema di husticia hubenil ta representa un paso progresivo cu ta enfoca riba supervision structura, responsabilidad y mehoracion di resultadonan di rehabilitacion. E programa ta destina pa fortifica efectividad di proceso hudicial, permitiendo hobennan cumpli cu condicionnan imponi door di corte bou di supervision monitoria.

   Buddi ta opera internacionalmente den Caribe Hulandes, Reino Uni, Europa, Merca, Australia y New Zealand, brindando servicionan basa riba mas di dos decada di experiencia. “Nos ta spera di mira progreso positivo cu e proyecto aki lo trece pa Aruba, McInerney a enfatisa.”

   Señora McInerney a reconoce tambe e colaboracion di Señora Pemberton-Leonard, cu tabata instrumental den e realisacion di e iniciativa importante aki.

   Cu un team local fuerte y apoyo tecnico internacional, Smart Justice “Buddi” ta aspira di contribui na resultado positivo pa e sistema di husticia di Aruba y sigui alinea cu standardnan moderno di supervision. E lansamento aki ta marca un paso importante den evolucion continuo di husticia na Aruba.