E dos polisnan envolvi den e caso di Pos Abao ta den man di Psikiatra

President Rodney Solognier di Sindicato SPA:

ORANJESTAD (AAN)-- Pa conclui su encuentro cu medionan di comunicacion, Diamars cu a pasa, señor Rodney Solognier, Presidente di Sindicato di Polis (SPA), a expresa cu SPA a bin dilanti pa enfrenta prensa, pasobra loke a sosode aña pasa cu e hoben Aiden Lanoy (unda tin dos polis envolvi tambe), ta completamente otro, cu loke a sosode Diamars na Pos Abao.

   “Locual a pasa aña pasa cu e persona Lanoy, ta completamente distinto na

loke a pasa Diamars. Tur cos ta diferente”, el a reitera.

   Solognier a enfatiza cu polis kier ta “bo amigo” y manera den autonan di polis ta skirbi seguridad nan ta trece, nan no kier trece problemanan entre nan y comunidad. “Manera hopi biaha nan ta bisa, nos ta un pais. Legalmente, nos un pais, pero ilegalmente si bo mira bon nos ta un ‘kleine dorpje’, nos tur ta dal den otro, nos tur sa ken ta otro, y mi ta kere cu lo mas bunita ta pa nos tur biba bon hunto cu otro, pero e circunstancianan cu ta pasa, ta pa via di otro departamentonan cu no ta funciona manera mester ta, anto polis ta haya e problema riba dje”, Rodney Solognier a argumenta.

   El a exclama cu polis tey pa yuda pueblo, pero pa tur cos nan ta yama polis, siendo cu tur hende ta, y tin, trabao pa haci “on the side” pa cu polis tambe.

   Solognier, contestando un pregunta di prensa, a indica cu e dos cabayeronan polis ta den man di cierto psiquiatra, pa haya atencion pa locual a pasa.

“No tur hende tin mente mes fuerte cu otro”, segun Rodney Solognier a expresa.