Prome cu carnaval BCI lo parti saco den tur parada di carnaval

Vocero Maikel Gomes:

ORANJESTAD (AAN) Den entrevista cu Matutino DIARIO, señor Maikel Gomes, vocero di City Inspector a duna di conoce cu Departamento di Infrastructura y Planificacion, DIP, a saca e Kavelnan caba y e personanan concerni sa ken ta haya cual lugar.

   “Loke ta Kavel no ta cay bao di nos tampoco, esey ta DIP. Esey ta otro tarea mas cu ta cay bao di Ley di  DIP.

   Pa loke ta tempo di carnaval, nos di City Inspector ta bay parti saco prome cu e paradanan di Playa, e chikito y e grandi, di San Nicolas tambe y Lighting Parade”, el a splica y a reitera cu loke ta e parti di kavel no ta cay bao di BCI.

   City Inspector lo sigui haci control y tanten cu ta durante carnaval y ta kita loke ta ilegal tambe.

“Mi ta bolbe haci un yamada na pueblo, como vocero di Bureau City Inspector y den nomber di Minister di Asuntonan General, pa tur esnan cu ta den carnaval mantene esaki limpi, y lag’e limpi manera bo hay’e. Y durante e tempo aki cu ainda carnaval no a cuminza, pa no pone sushi ni cera e kavelnan cu no ta pertenece na bo persona. No pone cabuya, ni nada otro, pasobra nos ta kit’e bek”, Maikel Gomes a señala.

   El a agrega cu di parti di BCI nan ta bay parti mas saco e aña aki, y el a haci un peticion na ATA tambe, y berdad nos a haya donacion di basta caha di saco, y esaki lo wordo reparti tambe. “Mi ta kere nos ta bay parti extra saco tambe, pues, un yamada tambe di danki pa ATA di nos banda, pa e donacion. Y nos ta pidi pueblo pa enjoy carnaval, pero tene e ruta limpi. Si boso hay’e limpi, lag’e limpi atras. P’esey nos ta parti saco”, Maikel Gomes a indica.

El a agrega cu saco lo wordo duna na tur hende, tanto esnan cu tin tent como esnan para na banda. Y tanten cu tin den stock nan ta duna mas na esnan cu ta pidi esey.