Meta di proyecto piloto di banchi di enkel ta pa guia detenidonan pa no haya nan involucra mas cu husticia

Seraida Pemberton Leonard:

ORANJESTAD (AAN): Personal di Reclassering, e siman aki a haya training pa uza e aplicacion/software di e programa di monitoreo electronico di Smart Justice “Buddi”. Director di Stichting Reclassering, señora Seraida Pemberton Leonard a remarca cu e proyecto aki ta acapara henter e sistema hudicial, entre otro Ministerio Publico, Corte di Prome Instancia, KPA, y Departamento di CEA.

   Pa loke ta trata e banchinan di enkel, señora Pemberton Leonard a duna di conoce, lo keda introduci den diferente fase. Ministerio publico lo dicidi ken lo cay den e prome grupo y lo haci peticion na hues comisario pa schors e detenido cu e condicion cu e lo uza e banchi. CEA ta pone y kita e banchi y den caso di violacion di condicionnan, e lo tuma accion hunto cu Reclassering. Reclassering ta monitoria e persona cu e banchi, hunto cu e compania Buddi. Y Reclassering ta duna guia tambe na e persona.

   E proceso di esaki no ta pa pone hende riba lista pa haya banchi, sino e ta bay segun e procedura penal cu ta dicidi ken ta bin na remarca pa haya banchi y ta enfoca riba menornan di edad, 12 – 23 aña. “No ta tur hende ta bin na remarca aworaki pa haya banchi. Esaki ta proyecto piloto na unda cu lo evalua na unda mester haci cambio y mehora pa despues amplia esaki mas, señora Pemberton Leonard a remarca.

    E momento cu e detinido bin na remarca pa haya un banchi, e ta wordo poni bou di guia di Reclassering y tur siman e mester presenta pa haya su schema cu ta indica kico mag di haci, unda mag di bay y unda no. E banchi ta controla e movecion di e persona y e no ta liber pa bay unda cu e kier. “Mas importante, e ta haya e guia necesario pa cambia su comportacion y mentalidad. E meta final ta pa e personanan ki no haya nan mas den problema cu husticia”, señora Pemberton Leonard a enfatisa.