Si 7 aña pasa no a boicotea e Incinerator awe lo tabata mas leu den maneho di sushi

Parlamentario Eduard Pieters di PPA:

ORANJESTAD (AAN) Parlamentario Eduard Pieters, di fraccion di PPA, a realiza un bishita na “Aruba Wastewater Sustainable Solutions (AWSS), pa cual, den entrevista cu Matutino DIARIO, el a expresa su gratitud.

   Pieters a bay bek den historia, pasobra e ta haya ta bon pa pueblo realiza esaki. El a bisa cu 27 aña pasa tabata tin rapportnan cu a sali, na unda cu Aruba a haya conseho pa bin cu incinerator.

   “E pais aki pa maneha su sushi, principalmente e medical waste, bo tin cu bin cu incinerator. No ta un cos cu aworaki nos sa di e situacion. 27 aña pasa ya tin rapport traha pa expertonan riba e area aki. Siete aña pasa, a bolbe haci intento pa bin cu incinerator, anto laga mi bisa esaki bon cla. Nan a boicotea e  proyecto eynan.. Boicotea e proyecto aki unda cu despues di siete aña aworaki nos ta wak un joya di proyecto aki atrobe, bao di maneho di Awss”, Pieters a comenta.

   El a agrega cu e proyecto aki, structuralmente, boicotea pa motibonan diferente, economico y politico, mester stop na Aruba. “Anto, awe nos ta wak cu Awss ta bin cu un incinerator, atrobe, di bon calidad, nan a splica nos cu e ta uza un energia, un combustible mas limpi, cu ta LPG, cu ta algo di aplaudi tambe, y nos ta wak tambe cu full e sistema tas hopi bentahoso pa uso di combustible. Y tambe, hopi importante ta, cu nan ta tene cuenta cu medio ambiente. Kiermen, e gas cu e ta produci di e medical waste aki, ta un gas cu no ta contamina, y banda di esey, loke nos por a compronde di Awss, nan ta bay keda monitorea full e area aki pa e contaminacion”, Pieters a indica.

   Señor Pieters a agrega cu tempo di Otmar Oduber, como miembro di Parlamento, pero e mes como parti di e fraccion di PPA y di Partido PPA, nan a papia di containernan pafo.

   “Casi un aña pasa nos a papia di medical waste y a wak cu enberdad a pone accion na palabra cu awe nos tin incinerator. Ainda nos no ta cla pasobra ainda tin containernan pafo, nos a wak nan pafo pero Awss a bin haya e situacion eynan”, Pieters a remarca.

El a bisa cu si siete aña pasa lo a cana e caminda manera mester ta, awe nos lo tabata mas leu cu e maneho di sushi”, Parlamentario Eduard Pieters, di fraccion di PPA, a reitera.