Parlamento di Aruba a aproba un mocion unanimamente pa desmantelacion di refineria

Parlamentario di AVP, John Hart:

ORANJESTAD (AAN): Durante un reunion publico den Parlamento di Aruba a trata un tema importante relata cu e desaroyo geopolitico na Venezuela, refineria y e posilibidadnan pa Aruba. “Tur debate cu ta trata San Nicolas y su mehoracion geo-economico ta mas cu bonbini den Parlamento di Aruba”. Hart ta indica.

Ta un echo cu e refineria ta 100 aña bieu y a wordo neglisha, p’esey desmantelacion di refineria ta e caminda nos dilanti. Parlamentario di AVP John Hart, a participa activamente den e reunion y a pone enfasis riba e necesidad pa trata e tema cu responsabilidad, claridad y pragmatismo.

Parlamento di Aruba a aproba un mocion unanimamente pa loke ta desmantelacion di refineria. Segun Hart, e decision aki ta basa riba hecho concreto y realidad tecnico. P’esey  ta importante cu pasonan nos dilanti ta sigur y firme pa San Nicolas. E desaroyonan geopolitico mester keda pragmatico.

Anto pragmatico ta cu un plan di desmantelacion mester encera cu ta sondea tambe kico ta e posibilidadnan di industria y e rol cu Aruba por hunga teniendo na cuenta cu e desaroyo geopolitico. Un ehempel ta transhipment cu por brinda oportunidad.  “Durante e reunion minister di energia a splica cu lo forma un comision di experto pa sondea e posibilidadnan” Hart a declara.

E meta principal ta pa crea un base solido pa un futuro economico mas duradero pa San Nicolas y Aruba den general.  AVP lo sigui promove un enfoke realistico, responsabel y orienta riba futuro, cu San Nicolas como un punto central di atencion.