Aruba ta fortalece relacionnan cu inversionistanan internacional durante foro PPIF Miami

Minister Geoffrety Wever:

• Reunion mas grandi di esnan cu ta emiti bono 

ORANJESTAD (AAN): Entrante awe Diamars 27 te cu Diahuebs 29 di januari, Minister di Finansa, Asunto Economico y Sector Primario, mr. Geoffrey Wever, lo participa den e Private Placements Industry Forum (PPIF) na Miami, Florida. E foro aki ta e reunion mundial mas grandi di instancianan cu ta emiti bono, inversionistanan institucional y agentenan activo den mercado internacional di capital, cu mas cu 1.300 participante.

   Pa Aruba, PPIF ta representa un oportunidad strategico importante pa pone minister Wever directamente den contacto cu inversionistanan cu ya tin bono di Aruba y pa, na mes momento, presenta Aruba na inversionistanan nobo pa asina amplia e base di inversionistanan. Participacion di Aruba den PPIF ta forma parti di un strategia consciente y di largo plaso pa consolida confianza y interes den credito Arubano.

   Aruba ta sigui logra cu tin demanda fuerte pa su papelnan financiero, a pesar di un nivel di debe cu, pa algun observador, por wordo considera halto. E resultado economico positivo, hunto cu un reduccion proactivo di debe, a contribui cu tin interes fuerte di inversionistanan. Esaki a keda refleha tambe den e emision di obligacion di fin di aña pasa cu a logra un costo historicamente abou. Esaki ta confirma cu Aruba a logra posiciona su mes como un producto financiero serio, confiabel y atractivo riba mercado internacional.

   E enfoke di Aruba riba mercado internacional di capital ta basa riba dos pilar fundamental: comunica di manera claro y transparente e rendimento financiero y economico di pais, y na mes momento construi y mantene un audiencia dispuesto pa scucha e narrativa impresionante di Aruba. Plataforma manera PPIF ta esencial den e strategia aki, pasobra ta crea espacio pa dialogo directo, intercambio di informacion y fortalecemento di relacionnan.

   Na Merca, Aruba ta gosa di un nivel di reconocimento y confianza solido entre inversionistanan institucional. E demanda continuo pa obligacionnan Arubano ta confirma cu e strategia di relacion y comunicacion constante ta funcionando. Pa inversionistanan institucional, no ta basta solamente conoce e cifranan; confianza den e maneho di politica y den e personanan responsabel pa e direccion strategico di pais ta mesun importante.

   Durante PPIF Miami, Minister Wever lo tene reunionnan bilateral cu inversionistanan selecto y poseedor di obligacionnan cu anteriormente tabata activo den deuda Arubano, asina tambe cu partidonan cu por considera inversion den futuro. Den e cuadro aki, Aruba lo reestablece y fortalece relacion cu institucionnan di gran peso, cu e obhetivo di mantene Aruba riba nan radar di inversion.

  Participacion den PPIF no tin como proposito logra resultado inmediato. “Nos obhetivo ta pa fortifica relacionnan, construi confianza y reforsa apetito pa den futuro nan sigui inverti den Aruba . Esaki ta un inversion den credibilidad y stabilidad financiero di pais,” segun minister Wever.

  Ademas di e enfoke riba mercado Mericano, Aruba ta sigui traha conscientemente riba diversificacion di su base di capital. E experencia di PPIF-Europe di aña 2025 a mustra cu Aruba su presencia den foro internacional ta resulta den mayor interes y preparacion di parti di inversionistanan Europeo. A traves di esaki, Aruba ta crea poco poco un audiencia Europeo cu ta sigui y evalua nos pais, pa ora cu oportunidadnan di inversion presenta, Aruba no ta wordo percibi como algo nobo of desconoci.

   “Den un mundo cu ta cambia rapido y cu dinamica geopolitico nobo, diversificacion di fuente di financiamento no ta solamente deseabel, sino necesario. Aruba ta actua proactivamente pa sigura stabilidad financiero y resiliencia economico a largo plaso,” Minister Wever a conclui.

   E participacion di Aruba den PPIF Miami ta confirma e compromiso continuo di Gabinete AVP-FUTURO pa un maneho responsabel di finansa publico y cu un posicion internacional fuerte, basa riba confianza, transparencia y relacion duradero.