Carta cu mas di 7 mil firma a keda entrega na Parlamento

Presidente di Parlamento Marlon  Sneek tocante Ley di Trafico:

• “Esaki ta un mensahe cla cu pueblo kier mira cambio!” 

ORANJESTAD (AAN) Presidente di Parlamento, señor Marlon Sneek, a referi, na e carta cu mas di siete mil ciudadano a firma, cu e peticion pa haci cambio den e Ley Di Trafico, y cu a wordo entrega na Parlamento door di e yiunan di señora Josely, kende dia 4 di Januari a perde nan bida den un accident cruel riba Boulevard dilanti Renaissance Mall.  E chauffeur mes a huy di e lugar sin sikiera stop.

   Sneek a declara cu e manifiesto aki ta un mensahe cla cu pueblo kier mira cambio.

   “Pa loke ta e trayecto di Parlamento nos tabata tin dos reunion caba, den cual a yama Minister di Husticia, pa nos por as haci preguntanan na unda e ta bayendo cu esaki, e den e caso aki e minister a bisa cu tin un Comision cu el a pone den otro, y e comision aki tin sugerencianan pa bin cu ne.

   Banda di esaki mi tin cu bisa cu tin un Ley di Iniciativa, di e fraccion di MEP, cu a cuminza traha riba dje na aña 2029, y Diabierna ultimo mi a ricibi e constestacion, riba e comentarionan cu Raad van Advies a haci. Pues ta un ley cu tabata den proceso caba, meramente pa atende e cantidad di añanan cu bo ta haya den un accidente cu consecuencia fatal” señor Sneek a comenta, dilanti e hoben cu su mama a perde su bida despues di a bira victima di un “hit & run”.

   Sneek a subraya cu e ley ta den Parlamento caba, y aworaki mester pidi un reunion central, p’asina e parlamentarionan por haci nan preguntanan riba dje, despues di esey esnan cu a tuma e iniciativa tin cu contesta e preguntanan aki, y e ora ey e ley ta cla pa bay den un reunion publico pa atende cu ne y cu proposicionnan cu a wordo poni di parti di e Fraccion di MEP den e caso aki. Asina Presidente di Parlamento a señala.

   Diasabra atardi a entrega un total di 7.694 firma, cu a ser colecta den 5 dia di tempo.