Agri-Innovation Park tin impactonan negativo pa nos medio ambiente

Kinsasha Thielman-van der Bliek:

ORANJESTAD (AAN):  Kinsasha Thielman-van der Bliek, un cunukero preocupa cu e impactonan negativo cu e proyecto di Agri-Innovation Park cu Minister Geoffrey Wever kier introduci, den un entrevista cu DIARIO a elabora riba e consecuencianan cu e proyecto aki tin pa nos medio ambiente. Señora Thielman-van der Bliek, e siman aki a reuni cu Minister Wever tocante e proyecto aki y e preocupacion cu e tin. Segun señora Thielman-van der Bliek, e inversion ta bayendo den innovacion enbes di fortalece prome e fundeshi di e sector.

   Segun e, na Aruba ainda no ta existi ley ni regulacionnan con ta maneha cu entre otro awa di desperdicio cu ta sali for di sistemanan hidroponico. Tampoco ta maneha responsablemente pesticida y fertilisante cu ta wordo uza den greenhouses grandi pa mitiga tur loke ta sosode den e greenhousenan.

  Señora Thielman-van der Bliek a enfatisa cu sin e ley y regulacionnan aki, tin riesgo grandi di contamina no solamente e tera sino tambe a awanan den subsuelo, cu pa medio di awacero y benanan subteraneo ta yega na lama y ta afecta ecosistemanan maritimo tambe.

   “E impactonan aki ta asina grandi, cu ta imposibel pa nengua nan of pretende cu nan no ta existi. Siendo cu na Hulanda caba, for di unda Aruba ta copiando e sistemanan aki, ya nan ta enfrenta hopi desafio di contaminacion di tera y di awa den areanan na unda cu tin greenhousesnan grandi”, el a duna di conoce.

   Segun Señora Thielman-van der Bliek, rapportnan ta mustra cu solamente un kwart di agricultornan cu ta cultiva den greenhousenan, ta mantene nan mes na leynan y regulacionnan. Mientras cu na Hulanda ta existi control y sancionnan caba. E sancionnan segun señora Thielman-van der Bliek, no ta coy loco. Asina mes cu ta existi e consecuencianan aki, e agricultornan na Hulanda no ta mantene nan mes na uzo responsabel cu ta permiti di fertilisante y pesticida.

   El a agrega cu ya for di aña pasa a trece na atencion di Minister Wever, como ex miembro di directiva di United Farmers Aruba (UFA), cu un reportage di medio ambiente ta indespensabel prome cu a inicia cu cualkier desaroyo di e proyecto, sinembargo te cu awo no a tende nada di e minister y tampoco e minister kier adresa e topico y preocupacionnan aki.

   “Nos ta un isla chikito. Nos ecosistemanan ta asina fragil, bou di asina hopi presion caba, cu bo no por nenga y ignora e impacto cu tin riba medio ambiente door di proyectonan manera Agri-Innovation Park”, señora Thielman-van der Bliek a enfatisa.