FADA ta invita companianan di seguro forma parti activo den campaña ‘Don’t drink and Drive’

Señora Rubiella Toppenberg di FADA:

ORANJESTAD (AAN): Aña 2026 a cuminsa cu varios accidente serio riba e careteranan di Aruba, unda hopi di nan ta relaciona cu uzo di alcohol. Esaki ta crea un preocupacion grandi pa e siguridad publico en general y ta enfatisa e necesidad pa mas programa y campaña di conscientisacion, y tambe medidanan mas drastico.

   Señora Rubiella Toppenberg di Fundacion Anti Droga Aruba (FADA), den un entrevista recien cu DIARIO, a duna di conoce cu e campaña di conscientisacion BAR, “Bo Amigo Responsabel”, a resulta hopi exitoso den 2025 y cu nan tin e intencion di sigui engrandece esaki den 2026. Sinembargo, pa por realisa y amplia un campaña asina, ta rekeri un presupuesto adecuado. Fada ta determina pa traha duru riba esaki y ta activamente buscando fondo pa por hiba e campaña na un escala mas grandi durante henter e aña, cu e meta di logra miho resultado.

   Señora Toppenberg a remarca tambe cu companianan di seguro por hunga un rol importante den esaki. FADA a acerca diferente compania di seguro pa invita nan forma parti activo di campañanan di “Don’t drink and drive”, pasobra, segun el a expresa, esaki ta beneficia no solamente e companianan di seguro, pero tambe henter e comunidad. “Pasobra na final di dia nos tur kier djies yega cas”, el a enfatisa.