Automobilistanan tin di comporta corectamente den trafico pa evita accidente

Francel Bernardus di SPA

• Aruba tin mas dalmento di auto den trafico cu Curaçao y Bonaire hunto 

ORANJESTAD (AAN):  Uzo di alcohol y celular ta keda e causante principal di mayoria, pa no bisa tur, accidente di trafico na Aruba. Ciudadanonan mes mester cuminsa asumi responsabilidad y comporta corectamente den trafico, pa evita accidentenan aki, hopi di nan cu a resulta fatal den e prome dianan di januari 2026, cu ta crea un gran preocupacion den nos comunidad.

   “Aunke Polis ta controla tur dia y si pone mas cu 100 polis riba caminda pa controla, ta e ciudadanonan mes mester cuminsa comporta nan mes den trafico como debe ser. Asina nos ta limita nos mes na hopi di e accidentenan aki,” asina señor Francel Bernardus, Vice Presidente di Sindicato SPA, a declara den un entrevista cu DIARIO.

   Segun señor Bernardus, Aruba tin mas dalmento di auto den trafico cu Curaçao y Bonaire hunto. Mayoria di e accidentenan ta wordo causa principalmente door di maneha bou di influencia di alcohol y pa uzo di celular. Polisnan cu ta atende accidentenan ta raporta cu chauffernan mes ta admiti cu, pa un momento, nan a kita bista di caminda pa wak nan celular, y ora nan a hisa cara, nan a dal tras di un otro auto.

  “Si nos, como ciudadanonan responsabel, cuminsa comporta nos mes den trafico, stop di kibra ley, stop di uza celular ora ta maneha, para na banda pa responde yamada of chat, y no maneha bou di influencia di alcohol, nos por ta mita caminda pa evita accidentenan,” señor Bernardus a enfatisa.