Prioridadnan den e incentivonan ta inclui maneho pa desaroya centro di Playa y San Nicolas

Minister Geoffrey Wever:

*Freezone tambe ta haya oportunidad nobo 

ORANJESTAD(AAN): Durante un Openbaar Bijeenkomst Diamars den Parlamento, minister di Finanzas y Economia Geoffrey Wever a duna un splicacion riba e incentivonan fiscal nobo, unda cu el a papia entre otro riba e tres asina yama Beleidsnotas y e LBHAM di Freezone.

   “A tuma tempo pa prepara e 4 documentonan di maneho pa nan drenta na vigor prome di Januari di 2026”, Wever a splica den Parlamento.

   El a sigui bisa cu e prome ta e Ex Pat Regeling, e di dos ta e Begunstigend Beleid pa San Nicolas y Oranjestad, e di tres ta e Starters Regeling y e di 4 ta e actividadnan nobo pa Freezone di Aruba.

“Esaki ta cuater iniciativanan cu a drenta na vigor riba prome di Januari di 2026 y ta resultado di un trabao amplio cu a wordo haci cu a cuminsa mas cu tres aña pasa, ora cu mi a institui e Commissie Economisch Herstel cu tabata consisti e tempo ey di entre otro AHATA, ATIA, Freezone, diferente fiscalista, diferente abogado, diferente accountant y Departamento di Asuntonan Economico”.

   Eigelijk el a cuminsa prome cu esey, segun e mandatario.  El a splica cu Departamento di Asuntonan Economico a haci un analisis di tur e paisnan den region, paisnan cu nos ta ‘benchmark’ nos mes cune y a bay wak kico nan a haci riba por ehempel terenonan di incentivonan fiscal of otro incentivonan pa stimula empresanan pa establece nan mes den nan hurisdiccion.

   Segun Eever, basa riba e rapport cu a wordo prepara na Departamento di Asuntonan Economico, a institui e ora ey e Commissie Economisch Herstel y e Commissie aki a bay brainstorm riba e rapport cu a wordo prepara.

   Esaki a pone cu a bin cu diferente recomendacion con pa stimula diferente pilar den nos economia, entre otro Status Regeling cu ta basa riba recomendacionnan cu  Commissie Economisch Herstel a duna.

“E incentivonan pa Oranjestad y San Nicolas a wordo delinea y recomenda den e rapport di Commissie Economisch Herstel”.

   Asina tabata tin diferente otro recomendacion , pero ora cu Gabinete AVP/Futuro a drenta na poder ya tabata tin un trabao haci cu 2 aña y mey mi a traha riba dje.

   E ora ey nos mester a scoge kico ta esunnan cu nos kier pa drenta na vigor riba 1 di Januari di 2026, segun Wever.

   El a splica cu door cu e proceso ta tuma hopi tempo, mester a scoge kico tin e prioridad pa 2026 y e ora ey a scoge pa e Expat Regeling ta completamente modernisa, pa tin un Starters Regeling, pa tin un maneho ta desaroya centro di Oranjestad y centro di San Nicolas y percura pa Freezone haya un oportunidad nobo y cuminsa haya clientenan nobo.