Kendra Maduro ta duna su banda di medaya di un situacion lamentable

‘Esaki tabata un asunto personal y niun di mi alumnonan tabata envolvi’

ORANJESTAD (AAN): Diadomingo cu a pasa a tuma luga un situacion lamentable na unda cu mester a pidi asistencia di polis. Esaki a bay viral hopi lihe na unda cu diferente pagina di noticia a circula un version di e storia cu no ta cuadra cu e berdad.

   Kendra Maduro a acerca DIARIO pa comparti su parti di medaya di loke a pasa en realidad e anochi en cuestion manera cu el a publica tambe riba su paginanan social.

   “Diadomingo anochi mi tabata pasando den un momento hopi dificil. Mi tabata na lama cu mi pareha unda dado momento el a bira malo y nos a bay Servicio di Emergencia na Hospital. Despues cu nan a trat’e, nos a bay cas. Na cas el a bolbe bira malo y mi a yama ambulans.”

   “Na yegada di e ambulans, un di e paramediconan (kende conoce mi pareha) a wak nos y den un tono di burla a hari y bisa ‘boso atrobe’, como cu el a wak nos caba na hospital y a wak y tabata sa cu mi pareha tabata malo.”

   Den e momento di preocupacion, miedo, stress y emocionnan halto, e palabranan ey no a cay den bon tera. Despues cu mi amiga a coregi e actitud nada profesional di e paramedico, e situacion a keda escala unda cu el a bin den mi cara y aki ta caminda cu mi a push'e. Mi reaccion no a sali for di malicia, sino di e sentido di proteccion y defensa propio. Nan a dicidi di yama Polis y mi a wordo hiba Warda di Polis.

   “Mi kier aclarea cu mi no tabata burachi ni bou influencia di niun substancia. Tambe mi kier aclarea cu esaki tabata un asunto personal, for di orarionan di scol, y entorno laboral. Niun di mi alumnonan tabata envolvi y e situacion lamentable aki no tin nada di haber cu e cuido, dedicacion, y responsabilidad cu semper mi a brinda na mi scol, mi muchanan y na e mayornan cu ta confia den nos.”

   “Mi ta pidi comprension y compasion. Tras di tur e headline news y comentarionan tin un persona di carni y weso, cu tin famia, dolor, y un storia cu merece di wordo scucha por completo y no solamente wordo husga. Ta duro pa sinta lesa cierto comentarionan di hendenan cu no conoce mi, y cu ami tampoco conoce, cu no tabata presente, pero asina mes a dicidi di husga, insulta y saca nan mesun conclusionnan sin busca pa sa e otro banda di storia”, Kendra a duna di conoce.

   Cu esaki, Kendra ta spera di por a aclarea di con el a haya su mes den un situacion asina lamentable. E ta sigui bisa cu prome cu circula noticia rond, prome cu comenta, husga of saca conclusion, pa tur hende pensa cu mañan esaki por pasa cu cualkier un di nos, cu un ser keri, cu den un momento di miedo y desesperacion, por pasa den un situacion asina.