Protocolnan di referencia a ser desaroya y aproba pa docternan di cas y specialistanan mes

Minister di Salubridad Publico, Mervin Wyatt-Ras:

ORANJESTAD (AAN): Minister di Salubridad Publico, Mervin Wyatt-Ras, den un encuentro cu prensa a anuncia oficialmente e lansamento di protocolnan entre Asociacion Docternan di Cas (Hava) y Asociacion Specialista Hospital di Aruba (Asha).

   Minister Wyatt-Ras a duna di conoce cu e protocolnan di refrerencia di docternan di cas pa specialistanan y di specialistanan bek pa docternan di cas ya ta den uzo. E proceso di e protocolnan aki, segun Minister di Salubridad Publico, a cuminsa for di seno di docternan di cas hunto cu specialistanan pa desaroya formulanan standarisa entre nan. Pa e pashentnan, esaki ta hopi importante tambe pa asina nan por tin un caminda mas agil pa cana y un proceso mas facil pa ser referi na un specialista pa cuido avansa y intenso.

   Segun Minister Wyatt-Ras, un di e metanan di e protocolnan ta pa e pashentnan por wordo referi mas eficiente y lihe na un specialista na un forma corecto y na e specialista corecto y pa evita retraso.

   E minister a remarca cu e protocolnan ta trece mas transparencia y ta obtenibel riba e websitenan di HAVA y ASHA pa asina comunidad di Aruba por ta na haltura di e criterianan di e 7 protocolnan.

   “E protocolnan a wordo traha y aproba door di docternan cu ta e mihonan cu sa con e referencia entre docter di cas y specialista ta bay miho. E resultado lo ta miho tambe pa e pashent cu merece un cuido medico di calidad halto,eleva, eficiente, y na un prijs pagabel. E protocolnan lo logra tur e metanan cu nos ministerio tin tambe pa cuido medico”, Minister Wyatt-Ras a enfatisa.