E situacion den trafico na Aruba ta alarmante y aña a habri cu hopi accidente

Rodney Solognier, Presidente SPA:

• KPA mester un structura nobo pa trece mas polis riba caya 

ORANJESTAD (AAN): Señor Rodney Solognier, presidente di Sindicato di Cuerpo Policial (SPA), den entrevista cu DIARIO a expresa cu e situacion den trafico di Aruba ta alarmante.

   “E aña aki a habri cu  hopi accidente, pero manera a wordo informa caba, awo ta bay tin mas y miho control riba tur locual ta pasando. Mi ta kere cu, eigenlijk, nos mester duna mas di nos parti y trece mas blauw den trafico, p’asina por trece mas alerta pa e chauffeurnan cu ta core rond, pa nan por tin mas precaucion”, el a señala.

   Solognier ta kere cu KPA mester haci un structura nobo, di manera cu nan por tin mas polis riba caya. El a comenta cu Korpschef mes a bisa cu nan tin poco personal, y ta dificil pa trece mas blauw riba caya. “Eigenlijk, mi ta kere cu mester genera mas polis na School Opleiding. Aworaki mes, mi a compronde cu tin un klas nobo cu ta bay cuminza, y cu nan etapa di estudio ta bay mas cortico. Esaki ta polis cu ta wordo poni pa haci mas control, nan no tin e calidad full di polis ainda, pero nan ta hulp agentenan. Nos no ta uza e palabra aki mas, pero pa pueblo compronde mas of menos den e direccion ey”, señor Rodney Solognier a indica.

   El a agrega cu normalmente nan ta wordo hopi uza pa mas control, pasobra nan trabao ta bay mas den esaki, y cosnan cu polis no ta haci mas pasobra no tin suficiente polis. No obstante, e plan cu tin ta pa KPA haya mas polis, pasobra nan mester di mas hende. “Mi ta wardando cu e aña aki nos tin dos klas saliendo, y un klas cu lo bay cuminza muy pronto”, señor Rodney Solognier, Relacionista Publico di KPA, a duna di conoce.